УИХ-ын чуулганы хуралдаанаар “Гацууртын ордын төрийн эзэмшлийн хувь тогтоох тухай” УИХ-ын тогтоолын төслийн хэлэлцэх эсэх хэлэлцүүлгийг хийв.

Гацууртын алтны үндсэн орд нь Сэлэнгэ аймгийн Мандал сумын нутагт оршдог бөгөөд ашиглалтын тусгай зөвшөөрөл эзэмшигч нь “Сентерра гоулд Монголиа” ХХК юм. Тус орд нь 50 036,05 кг буюу 50 тонн алтны нөөцтэй. Хязгаарлагдмал тодорхой нөхцөлд үр ашигтай нөөц нь 25 тонн, нийт 75 тонн алтны нөөцтэй.

Тус орд дээрх хэмжээний харьцангуй өндөр агуулга бүхий хүдэртэй. Ирээдүйд тухайн бүс нутгийн хөгжилд нөлөөлөхуйц, дэд бүтэц харьцангуй сайн хөгжсөн, цаашид ордын хэмжээнд нөөц өсөх магадлалтай юм. Гацууртын ордын төслийг хэрэгжүүлэхдээ толгой компани болох “Сентерра Гоулд Монголиа” ХХК нь  “Бороо гоулд” ХХК-ийн үлдэгдэл хөрөнгийг ашиглах бөгөөд үлдсэн хөрөнгө оруулалтыг зээл болон бусад эх үүсвэрээс  зохицуулах аж. Гацууртын алтны үндсэн орд нь ашиглалтад ороход бэлэн болсон төсөл бөгөөд нийт 9-10 жил  алт олборлох болон боловсруулах үйлдвэрлэл явуулна. Нийт хөрөнгө оруулалтын зардал нь 215.9 сая ам.доллар, үйл ажиллагааны зардал нь 1026.2 сая ам.доллар, 1769.2 сая ам.долларын борлуулалт хийж, 433,6 сая ам.долларын татвар, төлбөр, хураамж төлөх бөгөөд 1000 орчим ажлын байр бий болох юм. Иймд Гацууртын алтны үндсэн ордын төрийн эзэмшлийн хувь хэмжээг Ашигт малтмалын тухай хуулийн 5 дугаар зүйлийн 5.5, 472 дугаар зүйлийг үндэслэн тогтоож, эдийн засгийн эргэлтэд оруулах зайлшгүй шаардлага үүссэн аж.

Хэлэлцүүлгийн шатанд УИХ-ын гишүүн Ц.Даваасүрэн, "Ерөнхий сайдад хандаж хэлэхэд олон удаа хүндтэй индэр дээрээс тавьтиргүй байр суурь илэрхийлээд байна. Бусадтайгаа ижил хэрэлдэнэ гээд суугаад байж таарахгүй. Гацууртын асуудал 3 удаа орж ирсэн, анх удаа орж ирж байна гээд мэлзэхээр юунд итгэх юм бэ. Бөхөд цол дагаж бяр, улс төрд албан тушаал дагаж намба гэдэг. Намын ард сонгогдчихоод хүний үг цензурдээд сууж болохгүй. Энийгээ бас болих хэрэгтэй. Би энэ удаа нэрийг нь хэлэхгүй. Дараа ийм үйлдэл гаргавал хэлнэ. Манай улс эдийн засгийн хурдацаараа дэлхийд 3-т жагсаж байгаа мөртлөө хамгийн их өртэй 10 улс орны жагсаалтад орсон байна. Үр ашигтай байх тухай бид ярьж байна. 90-100 сая долларын төлөө энэ компани улайрч байна гэхэд эдийн засаг мэддэг хэн ч итгэхгүй. Аялал жуулчлалыг хөгжүүлье гэж Г.Уянга гишүүн хэллээ,  энэ зөв" гэв.

Харин УИХ-ын гишүүн С.Ганбаатар "Өвөг дээдсийнхээ булшийг хөндөж байна. Энэ саналаа татаж аваач ээ" гэсэн юм. Гишүүдийн олонхийн саналаар Гацууртын ордод төрийн эзэмшлийн хувийг тогтоох тухай тогтоолын төслийг хэлэлцэхийг дэмжив.

Т.Сар