УИХ-ын чуулганы хуралдаан эхэллээ. Хуралдаанаар Гаалийн болон нэмэгдсэн өртгийн албан татвараас чөлөөлөх тухай хуулийн төслийг хэлэлцэж эхлээд байна. Энэ нь импортоор оруулж ирэх үрийн буудайг татвараас чөлөөлөхтэй холбоотой зохицуулалт юм. Уг асуудлыг өчигдр үдээс өмнөх хуралдаанаар хэлэлцэж байгаад завсарласан.

Энэ оны ургац хураалтын дүнгээр нийтдээ 215.7 мянган тонн үр тариа, үүнээс 203.9 мянган тонн буудай хурааж аваад байна. Харин ирэх оны тариалалтад зориулж 335.7 мянган га талбайд чанар сайтай уринш боловсруулж бэлтгэсэн бөгөөд хаврын тариалалтад 48 мянган тонн орчим улаанбуудайн үр шаардлагатай байгаа юм. Гэвч ургац хураалтын дүнгээр дараа оны тариалалтад нийтдээ 28 мянган тонн улаанбуудайн үрийн нөөц бүрдээд байгаа хэдий ч 20 мянган тонн улаанбуудайн үр дутагдахаар байна. Энэ тооцоог үндэслэн Хүнсний аюулгүй байдлын үндэсний зөвлөлөөс 2016 онд 20 мянган тонн үрийн улаанбуудай импортлох зөвлөмж гаргасан. Иймээс импортоор оруулах үрийн улаанбуудайг Гаалийн болон нэмэгдсэн өртгийн албан татвараас чөлөөлөх зайлшгүй шаардлагын үүднээс чөлөөлөх уг хуулийн төслүүдийг боловсруулсныг төсөл санаачлагч хэлж байгаа юм.

Хуулийн төсөлтэй холбоотойгоор гишүүд асуулт тавьж эхлээд байна.

Тухайлбал, УИХ-ын гишүүн Д.Тэрбишдагва "Яам уг ажилд маш хариуцлагатай ажиллах ёстой. Үрийн буудайг оруулж ирж буй газруудад сайн хяналт тавих хэрэгтэй. Тооц судалгаагаа ч сайн зохион байгуулалттай байх хэрэгтэй" гэлээ.

Ингээд 20 мянган тонн улаанбуудайг Гаалийн болон Нэмэгдсэн өртгийн албан татвараас чөлөөлөх хуулийн төслийг хэлэлцэх нь зүйтэй гэж хуралдаанд оролцсон гишүүдийн 80.4 хувь нь үзлээ. Өнөөдөр Төсвийн байнгын хороо хуралдаж уг асуудлын анхны хэлэлцүүлгийг хийнэ.

Одоо чуулганы хуралдаанаар Сонгуулийн хуулийг хэлэлцэж эхлээд байна.

Т.Энхэлээ