Өчигдрийн Засгийн газар ээлжит бусаар хуралдаж хэд, хэдэн асуудлыг хэлэлцэн шийдвэрлэсэн байна. Тухайлбал, Гадаад хэргийн сайд Л.Пүрэвсүрэнд сахилгын шийтгэл ногдуулжээ. Танхимын зарчмаар ажиллах журмыг зөрчсөн Гадаад хэргийн сайд Л.Пүрэвсүрэн, Гадаад хэргийн яамны Төрийн нарийн бичгийн дарга Д.Ганхуяг, Барилга, хот байгуулалтын яамны Төрийн нарийн бичгийн дарга С.Магнайсүрэн нарт Төрийн албаны тухай хуулийг үндэслэн цалингийн хэмжээг 3 сарын хугацаагаар 20 хувь бууруулах сахилгын шийтгэл ногдуулсан байна.

Л.Пүрэвсүрэн нь төмөр замын хувьцааг Хятадын талд шилжүүлэх асуудлаар олон нийтэд ноцтой мэдээлэл тараасан юм. Хоёр улсын хамтын харилцаанд нөлөөлөх ноцтой мэдээллийг нягтлахгүйгээр тараасан гэж олон нийт түүнийг шүүмжилж байгаа

Нөгөөтэйгүүр эхэлж Засгийн газар дотроо уг асуудлыг хэлэлцэх ёстой байтал дур мэдэн баталгаагүй мэдээлэл цацсан нь түүнд анхааруулга өгөхөд хүргэсэн бололтой.

Цаашид Монгол Улсын нийгэм, эдийн засгийн тодорхой салбарын бодлого, үйл ажиллагаатай холбоотой аливаа асуудлаар тухайн асуудал эрхэлсэн Засгийн газрын гишүүн, яамдаар уламжлан төрийн хууль тогтоох, гүйцэтгэх дээд шатны байгууллага, албан тушаалтанд хандаж байхыг аймаг, нийслэл, сум, дүүргийн Засаг дарга, төрийн болон орон нутгийн өмчит үйлдвэрийн газрын захирлуудад үүрэг болгожээ.

Т.Энхэлээ