Өнгөрсөн долоо хоногт батлагдсан Сонгуулийн хуулийн асуудлаар УИХ-ын гишүүн Р.Бурмаа, А.Бакей мөн УИХ дахь МАН-ын бүлгийн дарга С.Бямбацогт нар мэдээлэл хийлээ.

Энэ талаар УИХ-ын гишүүн Р.Бурмаа "Тухайн хэвлэл мэдээллийн хэрэгсэл захиалгат мэдээллийг тодорхой тэмдэгтэйгээр нийтэлж, цацах ёстой. Нэр хаяггүй байвал тухайн хэвлэл мэдээллийн хэрэгслийн үйл ажиллагааг зогсооно. Нэр дэвшигч нь бусдыг гүтгэж, худал мэдээлэл цацуулсан бол УИХ-ын сонгуульд нэр дэвших эрхийг нь хязгаарлах бол хэвлэл мэдээллийн хэрэгсэл бусдыг гүтгэсэн мэдээлэл цацсан тохиолдолд үйл ажиллагаа эрхлэх тусгай зөвшөөрлийг нь 6 сар хүртэл хугацаагаар түдгэлзүүлнэ. Энэ бүхэн нь шүүхээр тогтоогдсон нөхцөлд авах арга хэмжээ гэдгийг тодотголоо. Улс төрийн албан тушаалтан УИХ-ын сонгуульд нэрээ дэвшүүлэх бол сонгууль болохоос 6 сарын өмнө албан тушаалаасаа чөлөөлөгдөх бол орон нутгийн сонгуульд нэр дэвших улс төрийн албан тушаалтан тухайн сонгууль болохоос 4 сарын өмнө албан тушаалаасаа чөлөөлөгдөнө" гэв.

Төрийн байгуулалтын байнгын хорооны дарга А.Бакей “Сонгуулийн хууль нь УИХ-д суудалтай нам, эвслийн бүлгийн зөвшилцлөөр батлагдсан. Өмнөхөөсөө дэвшилттэй сайн хууль батлагдсан. Мөн сонгууль холимог тогтолцоогоор буюу 48х28 хувилбараар, сонгуулийн сурталчилгааны хугацаа 18 хоног байна. Автомат машинаар уншуулсан саналын хуудасны 50 хүртэл хувьд техникийн тооллого хийнэ" гэлээ.

Харин УИХ дахь МАН-ын бүлгийн дарга С.Бямбацогт “28-ыг таван бүс болгох асуудал яригдаж байсан ч УИХ дахь МАХН-МҮАН-ын Шударга ёс эвслийн бүлэг, парламентад суудалгүй намууд эсэргүүцсэн учраас хуучнаар нь үлдээсэн. Гэхдээ 28-ын ард намууд хэн, хэнийг нэр дэвшүүлснийг сонгогчдод тодорхой болгох зорилгоор саналаа өгөхөөр ирэхэд нь нэрсийн жагсаалтыг харж, сонголтоо хийх боломжийг нь олгохоор шийдсэн” гэлээ.

Т.Энхэлээ