УИХ  дахь МАН-ын бүлэг ээлжит сюрпризээ шинэ жилийн баяртай давхцуулах нь. Эх сурвалжийн мэдээлж буйгаар тус бүлгээс Засгийн газрыг огцруулах тогтоолын төслийг тун ойрын хугацаанд өргөн барих гэнэ. МАН-ынхан Засгийн газрыг огцруулах асуудлыг аль эртнээс буюу өөрсдөө Засгийн газраас хөөгдсөн өдрөөс хойш ярьж эхэлсэн. Тэгвэл тэд ярьж байсан зүйлээ ажил хэрэг болгохоор хөдөлж эхлэх гэж буй нь энэ бололтой.

Тус намынхан Засгийн газрыг огцруулах үндэслэлээ эдийн засгийн хямралтай холбон тайлбарлаж байгаа аж. Учир нь Ч.Сайханбилэг Ерөнхий сайд болохдоо “Эдийн засаг, эдийн засаг, эдийн засаг” гэж хэлж байсан. Гэтэл түүнийг Засгийн газрыг тэргүүлэх хугацаанд эдийн засгийн үзүүлэлтүүд улам дордсон гэж МАН-ынхан үзэж байгаа юм байна. Мөн олон албан байгууллага аж, ахуй нэгж үйл ажиллагаагаа зогсоож хүнд байдалд орсон нь Засгийн газрын буруутай бодлого, үйл ажиллагаанаас болсон гэж үзсэн байна. Энэ мэтээр эдийн засгийн үзүүлэлтүүд улам дордож, хариуцлагагүй байдал даамжирсаар байвал Засгийн газрыг огцруулахаас өөр аргагүй гэж тус бүлгийн гишүүд өмнө нь мэдэгдэж байсан билээ.

Тус бүлгийн дарга С.Бямбацогт УИХ-ын чуулганы хуралдаанд “Эдийн засгийг элгээр нь мөлхүүлсэн Ч.Сайханбилэг сайдад эмгэнэл илэрхийлье” гэж хүртэл мэдэгдсэн.

УИХ-ын гишүүн Г.Уянга Ерөнхий сайд Ч.Сайханбилэгийг огцруулах бичигт гишүүдийн гарын үсгийг цуглуулж байгаа. Тэр бичигт нь нийт 15 гишүүн гарын үсэг зурсан гэх мэдээлэл бий. Гарын үсэг зурсан гишүүдийн дийлэнх нь МАН-ых. Тэгэхээр тэд тус бичигт гарын үсэг зурсан үйл ажиллагаагаа улам идэвхжүүлэх нь.

МАН-ынхан Засаг огцруулж сонгууль угтсан улс төрийн шоуг хийх зорилготой ч байж магадгүй юм. Учир нь удахгүй сонгууль болно. Сонгуулиас өмнө Засгийн газрыг огцруулж АН-ын дотор нь зодолдуулах цаашлаад муухай харагдуулах нь тэдний тактик байж мэднэ.

Т.Сар