Өнөөдөр хуралдахаар товлогдсон байнгын хороодын хуралдаан гишүүдийн ирц бүрдэхгүй байгаагаас болж хойшилсоор байна. Тухайлбал, УИХ-ын Нийгмийн бодлого, боловсрол, соёл, шинжлэх ухааны байнгын хорооны хуралдаан  09.00 цагт эхлэх байсан ч одоо хэр нь эхлээгүй байна.Тус байнгын хорооны хуралдаанаар Монголын Улаан загалмай нийгэмлэгийн эрх зүйн байдлын тухай хуулийн шинэчилсэн найруулга, Эрүүл ахуйн тухай хуулийн төсөл болон хамт өргөн мэдүүлэгдсэн бусад хуулийн төслүүд, Боловсролын тухай болон Дээд боловсролын тухай хуульд нэмэлт өөрчлөлт оруулах тухай хуулийн төслүүд, Монгол Улсын төрөөс хүн амын хөгжлийн талаар баримтлах цогц бодлого батлах тухай УИХ-ын тогтоолын төслийг хэлэлцэхээр төлөвлөжээ.

Мөн УИХ-ын Аюулгүй байдал, гадаад бодлогын байнгын хорооны хуралдаан ч ирцгүйгээс цуцлагдаж болзошгүй байна. Тус байнгын хорооны хуралдаанаар Монгол Улс нь Бүгд найрамдах Габон улс, Сент Люси улс, Бүгд найрамдах Нигер улс, Бүгд найрамдах Камерун улс, Маршаллын Арлуудын Бүгд найрамдах улстай тус бүр дипломат харилцаа тогтоох тухай асуудлыг хэлэлцэх юм. Дээрх орнууд нь НҮБ-ын гишүүн орон хэдий ч Монгол Улстай дипломат харилцаа тогтоогоогүй байгаа ажээ.

Т.Энхэлээ