НӨАТ-ын хоёр хувийн буцаан олголтын тухай хууль энэ сарын 1-ны өдрөөс хэрэгжиж эхлээд байна. Уг хуулийн хэрэгжилтийн явцын талаар Ерөнхий сайд Ч.Сайханбилэг болон Татварын Ерөнхий газрынхан мэдээлэл хийлээ.

Өнөөдөр Ерөнхий сайд Ч.Сайханбилэг Нэмэгдсэн өртгийн албан татварын /НӨАТ/ тухай хууль хэрэгжиж эхэлсэнтэй холбоотойгоор "Мини хайпер маркет"-д очиж худалдан авалт хийж баримтаа ebarimt.mn-д бүртгүүлэн баталгаажууллаа. Түүний уг дэлгүүрээс худалдан авсан бараа үйлчилгээний баримтанд бар код, сугалаанд оролцох тусгай тоо зэргийг хамт хэвлэсэн байсан билээ. Яг үүнтэй адил иргэн таны худалдан авсан бараа үйлчилгээ бүрийн баримтын доор тусгай код, тэмдэгтийн хамтаар байх ёстой юм. Иргэн та уг баримтаа цуглуулж жилийн эцэст нийт худалдан авсан бараа үйлчилгээ бүрийнхээ хоёр хувийн татварыг авахаас гадна хоёр долоо хоногт тутамд сугалаанд оролцох боломжтой болох юм. Сугалааны сан 22 тэрбум төгрөг бөгөөд сард хоёр удаа сугалаанд оролцох аж. Хэзээ ямар сугалаанд оролцох ёстойг ebarimt.mn-ээр байршуулах юм байна.

Ерөнхий сайд Ч.Сайханбилэг "Иргэн бүр худалдан авалтынхаа баримтыг үйлчилгээний байгууллагаас шаардан авах хэрэгтэй. Худалдан авалтынхаа баримтыг авснаар татварын хөнгөлөлт эдлэхээс гадна ганцхан татварын 1800 байцаагч бус Монгол Улсын гурван сая иргэн бүгд татварын хяналт тавих боломжтой болж байгаа юм. Иргэдийнхээ оролцоотой эдийн засгийг ил тод болгож байгаагаараа давуу талтай юм. Эдийн засгийн ил тод байдлын тухай хууль гарч далд, бүртгэлгүй байсан эд хөрөнгө бүртгэлтэй болж байна. Үүний араас Нэмэгдсэн өртгийн албан татварын /НӨАТ/ тухай хууль хэрэгжиж эхэлж байгаа нь бүртгэлгүй байсан зүйлүүд ил тод болж байна. Иргэд үйлчлүүлж байгаа газраасаа татварын баримт авъя. Би худалдан авалтынхаа хоёр хувийг авч, сугалаанд оролцоно гэж нэхэж авах хэрэгтэй" гэв.

Худалдаа үйлчилгээ эрхлэгч иргэн, ААН байгууллагууд нь худалдан авагч нартаа татварын нэгдсэн системээр баталгаажсан сугалаа бүхий баримтыг хэвлэж өгөх мөн Татварын ерөнхий хуулийн 18.1.8-д зааснаар Монгол Улсын стандартын шаардлага хангасан кассын машин хэвлэх төхөөрөмж, хэвлэлийн хор, тасалбарын цаас, постерминал машин хэрэглэх үүрэгтэй. Эдгээрийг энэ сарын 18-ны дотор хэрэглэж иргэдэд сугалааны кодтой баримт өгөхгүй бол аж, ахуй нэгжүүдийг нийт орлогынх нь хоёр хувиар нь торгох юм байна. Татварын Ерөнхий газрын 1800 байцаагч энэ хуулийн хэрэгжилтэд хяналт тавьж ажиллах аж.

Иргэдийн хувьд хамгийн эхлээд www.ebarimt.mn сайтад нэвтэрч хэрэглэгчээр бүртгүүлэн хувийн дугаартай болох ёстой. Бараа үйлчилгээ худалдан авч буй хувь хүн/иргэн/ та энэхүү баримтаа авч өөрийн нэр дээр бүртгүүлснээр төрөөс олгож байгаа НӨАТ-ын 20 хүртэл хувийн буцаалт болон сар бүр зохион байгуулагдах сугалаат урамшуулалд оролцож, 100 сая хүртэл төгрөгийг хожих боломжтой болох юм.

Ямартай ч одоогийн байдлаар “Петровис”, “Сод Монгол” ШТС, “Номин”, “Макс” хүнс, “Скай” худалдааны төв, “БОСА” сүлжээ дэлгүүр зэрэг газруудаас сугалаатай баримт хэвлэж эхлээд байгаа аж. 

Т.Энхэлээ