УИХ, Засгийн газрын гишүүн, Батлан хамгаалахын сайд Ц.Цолмон өнөөдөр Франц улсаас манай улсад суух Элчин сайд, хатагтай Элизабэт Барсак-ийг хүлээн авч уулзлаа. Уулзалтын эхэнд Батлан хамгаалах сайд Ц.Цолмон "Таныг шинэ албанд томилогдон Монгол Улсын Ерөнхийлөгчид Итгэмжлэх жуух бичгээ барьсанд тань баяр хүргэе. Монгол-Франц Улсуудын хамтын ажиллагаа улс төр эдийн засаг, нийгмийн  салбарт хурдацтай хөгжиж, түүний дотор хоёр орны батлан хамгаалах салбарын хамтын ажиллагаа улам өргөжин хөгжиж байгаад баяртай байдаг. Өнгөрсөн 2015 он манай хоёр улсны батлан хамгаалах салбарын харилцаанд тод мөрөө үлдээсэн он байлаа. Манай хоёр орны хамтын ажиллагаа шинэ шатанд гарч Монгол Улсын Ерөнхийлөгчийн албан ёсны айлчлал, мөн Монгол Улсын Батлан хамгаалахын сайд миний бие анх удаагаа Франц улсад айлчилсан зэрэг олон онцлог үйл явдлуудаар дүүрэн байлаа" хэмээн онцолсон.

2014 онд “Батлан хамгаалах салбарт хамтран ажиллах тухай Монгол Улсын Батлан хамгаалах яам, Бүгд Найрамдах Франц Улсын Батлан хамгаалахын яам хоорондын техникийн тохиролцоо”-г байгуулж, БНФУ-ын Батлан хамгаалах аж үйлдвэрийн компаниудын семинарыг Улаанбатар хотноо анх удаа зохион байгуулсан. Энэ 2016 онд бид хамтран энэхүү үзэсгэлэн – семинарыг 2 дахь удаагаа зохион байгуулахаар бэлтгэл ажил хангагдаад байна.

Цаашид Монгол Улсын батлан хамгаалах салбарын шинэчлэлийг гүнзгийрүүлэх, Зэвсэгт хүчний энхийг сахиулах чадавхийг нэмэгдүүлэх, олон улсын энхийг дэмжих, хүмүүнлэгийн ажиллагааны чиглэлээр туршлага солилцох, мэргэжлийн боловсон хүчнийг сургаж, бэлтгэх, батлан хамгаалах аж үйлдвэр зэрэг чиглэлээр бид хамтран ажиллах өргөн их боломж байгааг уулзалтын үеэр талууд онцолжээ. Уулзалтын үеэр БХЯ-ны Гадаад хамтын ажиллагааны дарга, бригадын генерал Ч.Сосорбарам нарын албаныхан хамт байлцав.