УИХ-ын гишүүн С.Ганбаатар Хөдөлмөрийн үндэсний намд элссэн талаараа мэдээлэл өглөө. Тэрбээр ХҮН-д элссэн шалтгаанаа “Ирэх жилүүдийг өнгөрсөн 25 жил шиг өнгөрөөхгүйн тулд Хөдөлмөрийн үндэсний намд элслээ. Монголчууд дахин 25 жил тэсч чадахгүй" хэмээн тайлбарлав.

Тэрбээр мөн "Одоогийн засгийн газар уул уурхайн томоохон үндэстэн дамнасан компаниудын хувийн засгийн газар шиг ажиллаж байна. Сүүлдээ УИХ хүртэл худалдагдсан мэт аашилж байна шүү дээ. 1.2 сая хөдөлмөрийн насны иргэдийн 470 мянга нь ажилгүй байдаг гэдэг бол үнэхээр харамсмаар зүйл. Дээрх асуудлыг шийдвэрлэх зорилгыг ХҮН дэвшүүлсэн тул би тус намд гишүүнээр элссэн" гэлээ.

Мэдээллийн дараа тэрбээр сэтгүүлчдийн сонирхсон асуултад хариуллаа.

-С.Ганбаатар гэдэг хүн анхнаасаа ХҮН-ын ард байсан мэдээлэл байдаг?

-Ташаа мэдээлэл гэж хэлмээр байна. Фэйсбүүкчид ялангуяа твиттерчид үргэлж намайг янз бүрээр хэлдэг. Энэ худал мэдээлэлд санаа зовохгүй байна.

-Бие даагчид Сонгуулийн хуулиар Үндсэн хуулийн цэцэд хандахаар болсон. Учир нь тус хуулиар жижиг намуудыг, бие даагчдыг шахсан гэж байгаа. ХҮН-ыг сонгоход Сонгуулийн хууль нөлөөлсөн үү?

-Хамт ажилласан Ц.Даваасүрэн, Х.Болорчулуун гишүүддээ би талархдаг. Бие даагчдыг шахсан, алхах газаргүй болгосон маш олон зүйл бий. Тэр бүх асуудлыг Үндсэн хуулийн цэцэнд хандан шийдвэрлүүлэх болов уу.

-Танай намыг барууны санхүүжилттэй нам гэж мэдээлсэн байсан. ХҮН нам санхүүжилтээ ил тод болгож болох уу?

-Намын бүхий л санхүүжилт бүгдэд нээлттэй. Барууны гар хөл гэвэл Ерөнхий сайд Ч.Сайханбилэг, Засгийн газрын хэрэг эрхлэх газрын дарга С.Бямбацогт нар "Рио Тинто"-гийн зараалууд. Би удахгүй энэ талаарх баримт дэлгэнэ.

-Таныг энэ намаас Ерөнхийлөгчийн сонгуульд нэр дэвшинэ гэж зарим хүмүүс таамаглаж байна. Энэ асуудал боломжтой юу?

-МАН, АН-ынхан “С.Ганбаатар Ерөнхийлөгчийн сонгуульд дэвшчихвэл ард иргэд дэмжих гээд байна” гэдэг бодлоор нойргүй хонож байна. Тэдэнд хандаж хэлэхэд Монголын ард түмэнд чин сэтгэлээсээ ханд. Үнэний үүр хутганы ир хоёр багаддаггүй юм. Ерөнхийлөгч болох эсэхийг хэн нэгэн улстөрч шийдэхгүй. Ард түмэн шийддэг юм.  

Т.Энхэлээ