Үндсэн хуулийн цэцээс гаргасан Үл хөдлөх хөрөнгийн барьцаатай холбоотой шийдвэрийн дараа арилжааны банкууд орон сууцны ипотекийн зээлийг зогсоосон.

Энэ нь иргэдийн бухимдлыг төрүүлээд зогсохгүй байртай болох боломжийг хязгаарласан. Тиймээс иргэдийг орон сууцжуулах хөтөлбөрийг зогсоохгүйн тулд УИХ-аас ажлын хэсэг гарган хуулийн төсөл боловсруулж байгаа.

Энэ ажлын талаар болон жилийн 8 хувийн хүүтэй олгогддог ипотекийн зээлийн хүүг бууруулах боломж бүрдсэн талаар УИХ-ын дарга З.Энхболд,  Монголбанкны ерөнхийлөгч Н.Золжаргал, Монголбанкны Хяналтын зөвлөлийн гишүүн Ж.Мөнхбат, Монголын Ипотекийн корпорацийн захирал Н.Гантөгс нар мэдээлэл хийв.

Энэ үеэр Монголбанкны ерөнхийлөгч Н.Золжаргал "Жилийн найман хувийн хүүтэй олгож байсан орон сууцны ипотекийн зээлийн хүүг 5 хувь болгож болох боломжтой" гэдгийг онцолсон бол УИХ-ын дарга З.Энхболд ч үүнийг онолын хувьд боломжтой хэмээв.

Тодруулбал, жилийн найман хувийн хүүтэй орон сууцны зээлд хамрагдан сард 512 мянган төгрөг төлдөг өрх хүү 5 хувь болсноор сард 400 мянгыг төлөх аж. Өөрөөр хэлбэл, сар бүр төлж байсан дүнгээсээ 110 мянга гаруй төгрөгөөр багасч буй юм.

Үүнээс гадна орон сууцны урьдчилгаа төлбөрийг 10 хувь болгон бууруулах боломжгүй гэдгийг ч УИХ-ын дарга хэлсэн.Харин тохиолдолд улсын төсвөөс 20 тэрбум төгрөг шаардах юм байна.