МАН-ынхан 2016 оныг баартай эхлүүлэв. Тус намын орон нутаг дахь салбар хорооны залуус шинэ жилийн баяр тэмдэглэх нэрээр архидан согтуурч улмаар зодоон хийн нэгийгээ хүндээр гэмтээсэн хэрэг гарлаа. Тодруулбал, Говь-Алтай, Орхон аймгийн МАН-ын залуус өөр, өөрсдийн орон нутагт уг хэргийг тарьж орхисон байна.  

Эхнээс нь дурдвал, Говь-Алтай аймгийн МАН-ын хорооны гишүүд болох В.Рэнцэндорж, В.Сүррагчаа нар өнгөрсөн сарын 30-ны өдөр Алтай хотын “Залуур Алтай” бааранд архидан согтуурч улмаар танхайран намынхаа нөхдийг зодож хүндээр гэмтээсэн талаар эх сурвалж мэдээлэв. Тэдэнд зодуулсан Д.Шинэбаяр, Алтайбаатар нарын биеийн байдал хүнд байгаа бөгөөд нэг нь эмнэлэгт хэвтэн эмчлүүлж байгаа аж. Тэд тус аймаг дахь МАН-ын хорооны дарга Ж.Ганбатын урилгаар цуглаад байхдаа уг зодооныг хийжээ. Хамгийн ноцтой нь уг хэргийг аймгийн цагдаагийн газраас шалгахгүй өнгөрч байгаа гэх мэдээллийг эх сурвалж өгөв. В.Рэнцэндорж, В.Сүррагчаа нар нь өмнө нь танхайн хэргээр тэнсэн харгалзах ялаар шийтгүүлж байсан бөгөөд  Өршөөлийн хуулиар өршөөгдөөд байсан гэнэ. В.Рэнцэндорж нь аймгийн НАМЗХ-ны дарга юм байна.

Мөн Орхон аймгийн МАН-ынхан өнгөрсөн сарын 29-нд баяр тэмдэглэж байгаад зодоон хийжээ. Баян-Өндөр сумын Дэнж багт байрлах Happiness club-д энэхүү үйл явдал болсон бөгөөд тус намын гишүүн н.Алтаншагай Д.Соёлчхүү нар хоорондоо маргалдаж, нэгнийгээ архины шилээр гэмтээсэн байна. Одоогоор цагдаагийнхан уг үйлдэлд эрүүгийн хэрэг үүсгэн шалгаж, мэдүүлэг авч эхэлжээ.

Ямартай ч соёлтой, мөнгөтэй, боловсролтой залуусаар хүрээгээ тэлж байгаа гэгддэг МАН-ын залгамж халаа, шинэ үеийнхэн иймэрхүү янзтай. 90 жилийн түүхтэй улс төрийн тулхтай хүчин гэгддэг намын залуу үе ийнхүү таагүй мэдээлэлд нэр холбогдож буй нь тус намын нэр хүндийг шавартай хутгаж байна. МАН-ын залуусын нэгнээ хутгалсан, машин шатаасан гэх хэргүүд бүр сүүлдээ иргэдийг дөжрөөх нь. Уг нь сонгууль дөхсөн энэ үед гишүүд нь дор бүрнээ намынхаа нэр хүндийг өсгөх, хамгаалах ёстой байтал зодооны асуудалд орооцолдож танхайн хэрэгтэн болж байдаг. Томчууд нь Төрийн ордонд улс төр хийн шоудаж, дүү нар нь бааранд шоудаж биенээ гэмтээсэн л дүр төрхийг л МАН-ынхан сүүлийн үед үзүүлдэг боллоо.

МАШИН ШАТААЖ, НЭГИЙГЭЭ ХУТГАЛСАН ХЭРЭГ

Өнгөрсөн намар тус намын дэргэдэх НАМЗХ-ын залуус Говь-Алтай аймагт чуулган зохион байгуулах нэрээр архидацгааж унаж явсан машинаа шатаасан хэрэг гарч байсан. Мөн Өвөрхангай аймагт бэсрэг наадам зохион байгуулцгаах үеэрээ  хоорондоо муудалцаж нэгийгээ хутгалж байв.

Т.Энхэлээ