“Херо” энтертайнмент студийн хулгайлагдсан бүтээлүүд өнгөрсөн амралтын өдрүүдэд нийгмийн сүлжээ хэрэглэгчдийг ярих яриатай өнжүүлэв. Дуулиан тарьсан уг асуудлын талаар “Херо” энтертайнмент студиас мэдэгдэл гаргаж, мэдээлэл хийсэн ч олны анхаарал уг сэдвээс хөндийрөөгүй байна. МАХН-ын дарга Н.Энхбаярын “Монгол тулгатны 100 эрхэм” нэвтрүүлэгт оролгүй хасагдаж, хөшигний цаана үлдсэн гэх уг бичлэгт хөтлөгч Э.Анужингийн бухимдал, Н.Энхбаярын эхнэр О.Цолмонгийн яриа олны нүдийг бүлтийлгэж бас ч үгүй дургүйцлийг нь хүргэж орхисон юм. Мөн хүмүүс "Херо" энтертайнментыг буруутгаж байлаа.

Тодруулбал, МАХН-ын дарга Н.Энхбаярын эхнэр О.Цолмон уг бичлэгт "Би ч юм уу, Н.Энхбаяр ч юм уу, бид нар хор найруулаад эхлэх юм бол юун Ц.Элбэгдорж, юун С.Баяр, юун Ц.Нямдорж, тэд нарыг бүгдийг нь нийлүүлснээс илүүг хийж чадна гэдгийг ойлгож байна уу, үгүй юу? Миний толгой, миний ухаан тэд нарыг нийлүүлээд найм дахин эргүүлснээс ч илүү хор найруулж чадна, муу юм хийж чадна шүү дээ. Н.Энхбаяр бол надаас арай бага, угаасаа муу хүн биш учраас. Гэхдээ би нэг гараараа нөгөө гараа барьсаар байгаад өдий хүрсэн. Би өнөөдөр доошоо орчихсон, хамгийн дор байгаа юм шиг боловч үгүй, нэг ........ юм бол пүхх гээд бүгдийг гаргаад ирж чадна шүү дээ. Муу юм хийх амархан шүү дээ. Би урд төрөлдөө аймар том лам байсан юм шиг байна лээ. Би судар уншиж үзээгүй ч юу болохыг мэдээд байдаг" гэж ярьсан юм.

Н.Энхбаяр ч мөн Монголын улс төрчдийн талаар таагүй яриа өрнүүлж Ерөнхийлөгч Ц.Элбэгдорж, УИХ-ын гишүүн Ц.Нямдорж нарыг жижигхэн амьтад шүү гэх утга бүхий зүйлийг ярьсан.

Нэгэн цагт Төрийн тэргүүн, тэргүүн хатагтай явсан тэдний ингэж ярьсан бичлэгийг “Херо” энтертайнментаас зорилготойгоор цацаж байна гэж хүмүүс эхэндээ ойлгож байлаа. Гэтэл бичлэг цацагдаад удаагүй байтал тус студиэс мэдээлэл хийж “Манай архиваас бичлэг алдагдсан” гэж хэлсэн юм. Хамгийн чухал нь тус студийн захирал Б.Баатар хулгайчид ажлын байранд минь орж ирээд хаалга эвдээд компьютерээс бичлэгийг хулгайлаад аваад явчихсан байсан. Эсвэл хакердчихсан байсан гэсэн процессыг ярьсангүй. Уг нь тэр үүнийг л тодорхой ярих ёстой байлаа. Гэтэл тэрбээр  маш нарийн зохион байгуулалттайгаар хулгайлчихсан гэсэн бүдэг мэдээллийг өгөв. Студи дотроосоо хулгайлаагүй л бол ийм зүйлийг ярих л ёстой шүү дээ.

Эдгээрээс үзвэл Н.Энхбаяр, О.Цолмон нарыг хардах нэг үндэслэл байна. Сонгууль дөхсөн энэ үед уг бичлэгийг зохион байгуулалттайгаар цацаж улс төрчдийг айлгах тактикийг явуулж байгаа юм биш биз. Учир нь уг бичлэгт О.Цолмон "Би бол аймар хор найруулагч, урд төрөлдөө том лам байсан. Яаж ч мэднэ" гэсэн бол Н.Энхбаяр "Одоогийн улс төрчдийн булхайг" дэлгэнэ гэж ярьсан. Үүнээс үзвэл тэд өрсөлдөгчдөө айлгахын тулд уг бичлэгийг цацуулсан байхыг үгүйсгэх аргагүй. Эсвэл бүр эсрэгээрээ Н.Энхбаяр болон түүний гэр бүлийн нэр хүндэд халдах гэсэн үйлдэл ч байж мэдэх юм.

Найруулагч Б.Баатар мөн “Магадгүй МУ-ын өөр ерөнхийлөгчийн дүрс ч алдагдсан байж магадгүй. Мөн бид С.Зориг агсны талаар баримтат кино хийх гээд материалууд цуглуулж байсан. Тухайн үеийн сонинд гарч байсан хайчилбарууд гээд  нэлээд баримтууд байсан юм. Тэр болгоныг бид скайнердаад харданд хадгалсан байсан. Тэр байхгүй болсон гэж хэлсэн юм.

Үүнээс одоогийн Ерөнхийлөгч Ц.Элбэгдоржийн оролцсон "Монгол тулгатны 100 эрхэм" нэвтрүүлгийн хасагдсан хэсэг ч алга болсон гэж ойлгож болохоор байна. Удахгүй Ерөнхийлөгч Ц.Элбэгдоржийн дээрхтэй адил бичлэг ч гарч ирж олны анхаарлыг татаж мэдэхээр байгаа юм. Яг хулгайд алдагдсан л бол шүү дээ.

Ямартай ч алдсан хүн нь улс төрийн захиалга гэж буй уг хэрэг хэрхэн шийдэгдэх нь олны анхаарлыг ихээхэн татаж байна. Хэрвээ "Херо" энтертайнмент бичлэгээ алдсан удахгүй хулгай ч баригдана. Харин уг хэрэг нам, гүм болбол эсрэгээрээ Н.Энхбаяр, О.Цолмон нарын захиалга болж мэдэх хардлагыг иргэдэд төрүүлж байна.

Т.Энхэлээ