УИХ-ын Төсвийн байнгын хорооны хуралдаанаар Засгийн газраас өргөн мэдүүлсэн Хүний хөгжил сангийн тухай хуульд нэмэлт, өөрчлөлт оруулах тухай хуулийн төслийг хэлэлцэх эсэхийг хэлэлцээд гишүүдийн олонхийн саналаар дэмжлээ. Тодруулбал, хүүхэд бүрт 20 мянган төгрөгийг ялгаварлахгүйгээр олгох тухай асуудлыг хэлэлцсэн юм. Засгийн газраас 2016 оны төсөвт тодотгол хийхдээ амьжиргааны дунджаас дээш өрхийн хүүхдүүдэд мөнгөн тэтгэмж олгохгүй байхаар тогтсон. Энэ нь нийгэмд ихээхэн шүүмжлэл дагуулах болсон учир дахин хүүхэд бүрт мөнгө олгох хуулийн төслийг боловсруулан оруулж ирсэн нь энэ юм.

Байнгын хорооны өнөөдрийн хуралдаанаар уг асуудлыг хэлэлцэх үеэр УИХ-ын гишүүд “Хүүхдийн мөнгө бол халамж биш. Харин хүндээ оруулж буй хөрөнгө оруулалт. Тиймээс үүнийг халамжтай харьцуулж болохгүй. Цаашид хүндээ оруулах хөрөнгө оруулалт гэдэг үүднээс олгогдоод явах ёстой” гэсэн санааг илэрхийлж байсан юм.

Хуулийн төслийн анхны хэлэлцүүлгийг хийх үеэр тогтоолын төсөлтэй холбоотой дагалдах бусад асуудлуудыг хэлэлцэж шийдвэрлэнэ гэлээ. Мөн өсвийн тодотгол зайлшгүй орж ирэх ёстой гэсэн саналд хүрлээ.

Сангийн сайд Б.Болор энэ талаар “Төсвийн тодотгол хийж таарна. Гэхдээ эхний 9 сардаа хүүхдийн мөнгийг бүтэн олгоод явах боломжтой. Тодотголтоо заавал тусгай өгөх ёстой” гэлээ.

Т.Хулан