УИХ-ын чуулганы хуралдаанаар Хүний хөгжил сангийн тухай хуульд өөрчлөлт оруулах тухай хууль буюу хүүхэд бүрт 20 мянган төгрөгийг ялгаварлалгүйгээр олгох асуудлыг хэлэлцэж байна.

Хэлэлцэж буй асуудалтай холбогдуулан УИХ дахь МАН-ын бүлгийн дарга С.Бямбацогт “Хүүхдийн мөнгийг нэмэхийг дэмжиж байгаа. Гэхдээ яагаад хасна гэсэн юм, яагаад одоо нэмэх болов. Бодлогогүй байна вэ. Хүүхдийн мөнгө авахгүй гэх бүртгэлд орсон 400 мянга орчим хүүхдийн эцэг, эх сэтгэл санааны хямралаа нэхэх эрхтэй. 300 мянга орчим айл өрх яагаад судалгаанд хамрагдсангүй вэ, 600 орчим сая төгрөг зарцуулж судалгаа хийсэн байж. Үүнд С.Эрдэнэ сайд хариулт өг. 2016 оны төсвийн тодотголыг өргөн мэдүүлэхгүй болохоор хүүхдэд 20 мянга биш 12 мянган төгрөг ногдох болж байгаа. Төсвийн тодотголоо хэзээ оруулж ирэх вэ гэдгийг тодруулж байна” гэлээ.

Түүний асуултад УИХ-ын гишүүн, ХАХНХ-ын сайд С.Эрдэнэ хариулахдаа “Одоо байгаа мөнгөөр 8 сарыг дуустал хүүхдийн мөнгийг бүрэн тавих бүрэн боломжтой. Өнгөрсөн хугацаанд хүүхдийн мөнгийг бүрэн олгоод ирсэн. Хүүхдийн мөнгөний эх үүсвэр дутсан тохиолдолд төсвийн тодотголоор үлдсэн мөнгийг шийднэ гэсэн төлөвлөгөөтэй байгаа” гэлээ.

Т.Энхэлээ