Өнөөдөр Ардчилсан намын дэргэдэх Ардчилсан эмэгтэйчүүдийн холбооны дөрөвдүгээр дээд чуулган өнөөдөр Төрийн ордонд болно. Таван жилийн дараа болж буй уг хуралдаанаар Ардчилсан эмэгтэйчүүдийн холбооны тэргүүнийг сонгох сонгууль болох юм. Уг холбооны тэргүүнээр одоо ажиллаж буй УИХ-ын гишүүн Ц.Оюунгэрэл үүрэгт ажлаасаа чөлөөлөгдөх гэж буй бөгөөд улс төрөөс завсарлага авах гэж байгаагаа мэдэгдсэн билээ. Тиймээс түүний орны хүнийг сонгох сонгууль болох гэж байгаа нь энэ юм.

АЭХ-ны тэргүүнд Б.Ургамалцэцэг, С.Одонтуяа, Л.Эрдэнэчимэг, Г.Байгальмаа,  Ц.Одонтунгалаг, И.Нарантуяа, Д.Оюунцэцэг, Л.Нармандах, Г.Хажидмаа, Д.Цэрэнчимэг нар нэр дэвшиж байгаа билээ.

Эдгээр эмэгтэйчүүдээс Ерөнхий сайдын зөвлөх Б.Ургамалцэцэгийг тэргүүнээр сонгогдох магадлал өндөр байгаа талаар улс төрийн хүрээнд ярьж байна. Учир нь Б.Ургамалцэцэг нь намын "гал тогоо"-г олон жил чадварлаг удирдсан улс төрийн  арвин туршлагатай эмэгтэй юм.

Түүнийг Ардчилсан намын өндөр боловсролтой эмэгтэй гишүүдийн нэг гэдэг.  Тэрбээр 1999 онд  Удирдлагын академийг төрийн удирдлагын менежерээр төгссөн бол, 2004 онд АНУ-ын Коннектикут мужийн Бридж Фортын их сургуулийг боловсролын  магистр зэргээр хамгаалсан.

Тэрбээр мөн өнгөрсөн хугацаанд АН-ын улс төрийн ажилтан, хэлтсийн дарга, нарийн бичгийн дарга, БСШУ-ны дэд сайдын албыг хариуцлагатай хашиж ирснийг доорх танилцуулгаас харж болно. Б.Ургамалцэцэг нь АН-ын хүний нөөцийн хэлтсийн дарга байхдаа намын гишүүдийнхээ боловсрол, мэдлэгийг дээшлүүлэх чиглэлд “Сум-330 тэтгэлэгт хөтөлбөр”-ийг анх санаачилж хэрэгжүүлсэн байна. Уг хөтөлбөрийн хүрээнд Монголын 330 сумаас нэг хүнийг сонгон авч Удирдлагын академид суралцуулжээ.

Түүний тухай илүү дэлгэрэнгүй баримтыг энд дарж уншина уу.

Т.Хулан