АН-ын ҮЗХ-ны 46 дугаар ээлжит хуралдаан өнөөдөр 17.00 цагт эхэлнэ. Намын гишүүдийг удтал хүлээлгэсэн уг хуралдаанаар ирэх сонгуульд хэрхэн, яаж оролцох болон намын дүрэмд өөрчлөлт оруулах, гишүүний татварыг нэмэх, сонгуульд ИЗНН, МҮАН-тай хамтарч оролцох, ротацаар нэмэгдсэн шинэ гишүүдийг батламжлах, ерөнхий нарийн бичгийн даргын үүрэг гүйцэтгэгч Л.Эрхэмбаярыг жинхлэх эсэх гэх мэт асуудлыг хэлэлцэх аж. 

Хуралдаанаар хэлэлцэх албан ёсны сценари нь энэ гэж буй ч хачир дээрээ халирам халуун хурал болох магадлалтайг эх сурвалжуууд мэдээлж байна. Тодруулбал, тус хуралдаанаар өнгөрсөн гурван жилийн хугацаанд АН улс орны амьдрал, улс, төр эдийн засгийг хэрхэн авч ирснээ ярилцаж, хэрвээ өмнөхөөсөө дордсон бол хэнд арга хэмжээ авах ёстойг ч хэлэлцэх гэнэ. Өнгөрсөн удаад тус намын Удирдах зөвлөлийн зарим гишүүд болон жирийн гишүүд, дэмжигчид намын дарга З.Энхболдыг "Ротацаа гацаалаа. Намынхаа цусны эргэлтийг боож байна" хэмээн удаа дараа мэдээлэл хийж байлаа. Бүр намынхаа гишүүдийг ялгаварлан гадуурхдаг, эрх мэдлээ хэтрүүлэн ашиглаж ирэх сонгуульд хэнийг хаана нэр дэвшүүлэхээ толгой мэдэн шийдвэрлэсэн гэх мэдээллийг өгч байв. АН-ын дүрэмд зааснаар бол, ҮЗХ-ны 228 суудлын гуравны нэг буюу 76 гишүүнийг жил бүр ротацаар сонгох ёстой. Гэвч сүүлийн хэдэн жил АН-ын цус сэлбэх гэх үйл явц бүр мөсөн тасраад байгаа юм.  Учир нь тус намын ҮЗХ-ны ихэнх гишүүн төрийн албан хаагчид болсон учир өөрчлөлт хийх хэрэгтэй болсон.

Ямарсайндаа л намынхаа баярын хурал дээр уриа, лоозон барьж бужигнуулж байхав. Тэд өнөөдрийн хурал дээр намын дарга болон ерөнхий нарийн бичгийн даргын эсрэг дуугүй байхгүй нь тодорхой. Баярын хурлын үеэр болсон үйл явдлаас ч долоон дор үйл явдал болж магадгүй. Эх сурвалжийн мэдээлж буйгаар ерөнхий нарийн бичгийн даргын үүрэг гүйцэтгэгч Л.Эрхэмбаярыг жинхлэх эсэх асуудлаар бөөн хэрүүл болж магадгүй гэнэ. Хэрвээ Л.Эрхэмбаяр ҮЗХ-ны гишүүдийн олонхийн дэмжлэгийг авч чадахгүй бол албан тушаалаасаа унах ч магадлалтай байгаа юм. Хамгийн гол нь тэрбээр гишүүдийн дэмжлэгийг авч чадах хэмжээний хүн биш гэх.

Тус намын дарга З.Энхболд нэг жил орчмын өмнө "АН фракцгүй нам боллоо" хэмээн зарласан. Тодруулбал тэрбээр, АН-аас сонгуульд нэр дэвших хүмүүсийг ямар фракцынх, хэр их хандив өргөсөн гэдгийг нь үл харгалзан тодруулахаа амласан боловч энэ нь хий хоосон тунхаглал байсан гэдэг нь өнгөрсөн хугацаанд хангалттай нотлогдсон. Энэ удаа ч мөн УИХ-д нэр дэвших гишүүдийн асуудлаар ханцуйн дотроо наймаалцах нь тодорхой юм.

АН Гүйцэтгэх зөвлөлийн хурлаараа тус нам сонгуульд ИЗНН болон МҮАН-тай нэгдэн оролцох талаар хэлэлцсэн. Тэгэхээр дээрх хоёр намтай нэгдэж сонгуульд оролцох эсэхийг зайлшгүй ярина. Уг асуудалд ҮЗХ-ны гишүүдийн саналыг сонсож ямар байр, суурьтай байгааг нь асуух байна.

Ямартай ч З.Энхболдыг даргалсан анхны ҮЗХ-ныс хурал ярих асуудал олонтой, хэлэлцэх сэдэв ихтэй л болох нь.

Т.Хулан