Унгар улсын Ерөнхий сайд Виктор Орбан энэ сарын 24- 26-нд манай улсад албан ёсны айлчлал хийнэ. Энэхүү айлчлал нь Монгол Улсад хэрэгжүүлж буй Унгар улсын Ерөнхий сайдын төвшний анхны айлчлал гэдгээрээ онцлог юм. Мөн 2016 онд манай улсад ирж буй анхны хүндтэй зочин юм.
Айлчлалын хүрээнд Унгар улсын Ерөнхий сайд Виктор Орбан Монгол Улсын Ерөнхий сайд Ч.Сайханбилэгтэй ганцаарчилсан уулзалт, өргөтгөсөн хэлэлцээ хийж, Ерөнхийлөгч Ц.Элбэгдорж, УИХ-ын дарга З.Энхболд нарт бараалхана. Ерөнхий сайд В.Орбаныг дагалдан Унгар улсын Гадаад хэрэг, худалдааны сайд, Батлан хамгаалахын сайд, Эдийн засгийн сайд, Үндэсний хөгжлийн сайд, Хөдөө аж ахуйн сайд нараас гадна 40 гаруй компанийн 60 орчим бизнес төлөөлөгч ирэх юм байна. Айлчлалын үеэр хоёр талын бизнес форум зохион байгуулахаар төлөвлөжээ.
