Ардчилсан эмэгтэйчүүдийн холбооны тэргүүнийг сонгох дөрөвдүгээр дээд чуулган өнгөрсөн даваа гаригт Төрийн ордонд болж өндөрлөсөн. Тэгвэл уг холбооны тэргүүнийг сонгох сонгууль хууль зөрчсөн, будлиантай болсон гэх мэдээлэл гарч эхэллээ.

 Тухайлбал, тус холбооны тэргүүний суудлын төлөө 10 эмэгтэй нэр дэвшсэн ч явцын дунд С.Одонтуяа, Б.Ургамалцэцэг хоёр тунаж, өрсөлдсөн билээ. Хурлын үеэр УИХ-ын гишүүн С.Одонтуяаг холбооны гишүүдэд мөнгө тараасан гэх хов, жив яригдаж байгаа. Түүнээс гадна уг сонгуульд оролцож санал өгсөн  СЗХ-ны дарга З.Нарантуяа нь ажлаасаа чөлөөлөгдөх өргөдлөө өгсөн ч УИХ-аас албан ёсоор чөлөөлөөгүй хэрнээ санал өгсөн гэх явдал. Тэрбээр даваа гаригт болсон АЭХ-ны сонгуульд оролцож, С.Одонтуяагийн төлөө санал өгсөн нь Төрийн албаны хууль, төрийн албаны ёс зүйг зөрчсөн гэж  үзэх хүмүүс байна.

 Тодруулбал Төрийн албаны тухай хуулийн “8.1.2. Монголбанкны Ерөнхийлөгч, тэргүүн дэд, дэд Ерөнхийлөгч, Санхүүгийн зохицуулах хорооны дарга, орон тооны гишүүн, Үндэсний статистикийн газрын дарга, дэд дарга; 15 дугаар зүйл.Төрийн жинхэнэ албан хаагчийн үйл 15.1.1. албан үүрэгтэйгээ холбогдолгүй асуудлаар нам, төрийн бус болон шашны байгууллагын үйл ажиллагаанд төрийн албан хаагчийн хувьд оролцох” гэх заалтыг зөрчсөн байна.

Хэрэв түүний санал хүчингүйд тооцогдвол С.Одонтуяа, Г.Ургамалцэцэг хоёр тэнцсэн  бололтой.

Т.Энхэлээ