УИХ дах МАН-ын бүлэг хуралдаж гурван асуудалд санал нэгджээ. Бүлгээр хэлэлцсэн асуудлын талаар бүлгийн дарга С.Бямбацогт, дэд дарга Н.Номтойбаяр, Д.Хаянхярваа нар мэдээлэл хийлээ. 

Тус бүлэг доорх гурван асуудалд санал нэгдсэн байна. Тодруулбал, 

1.    Засгийн газрыг огцруулах эсэх асуудлыг хэлэлцээд огцруулах нь зүйтэй гэдэгт 100 хувь санал нэгджээ. 

2.    УИХ-ын дарга З.Энхболдыг өөрийн саналаар огцрох ёстой гэсэн шаардлагыг энэ долоо хоногтоо багтаан хүргүүлэхээр болсон байна. 

3.    Нийслэлийн мандатын тоог нэмэхийг эсэргүүцсэн байр, суурьт хүрэхээр болжээ. 

МАН-ын бүлгийн дарга С.Бямбацогт Засгийн газрыг огцруулах үндэслэлийг тайлбарлахдаа, 

1.    Ерөнхий сайд Ч.Сайханбилэг татварыг нэг ч төгрөгөөр нэмэхгүй гэж хэлчихээд ард түмнийг хуурсан. Тухайлбал, дэлхийн зах зээлд бензиний үнэ буурч байхад Монголд буураагүй явж байна. Буух боломж, бололцоог нь татвар нэмэх замаар хаасан. Мөн Малчдын амьдралыг хүнд байдалд оруулсан. Малын гаралтай түүхий эд, ноос, ноолуурын үнэ түүхэндээ байхгүйгээр унасан. Малчид нэг тэрбум долларын махыг гадны орнууд руу хэзээ гаргах юм бол гээд хүлээж байна.

2.    Амьжиргааны түвшнийг тогтоох судалгааг Засгийн газраас бүхэл бүтэн 6 тэрбум төгрөг зарцуулж явуулсан. Тэр судалгаандаа үндэслэн 300 мянган хүүхдэд мөнгө олгохгүй гэж шийдвэрлэсэн. Үүнээс болж иргэд бухимдсан. 

3.   Ерөнхий сайд Ч.Сайханбилэг анх уг албан тушаалд очихдоо “Эдийн засаг, эдийн засаг, эдийн засаг” гэж хэлж байсан. Өнөөдөр эдийн засгийн өсөлт 2 хувь болж буурсан байна. Валютын ханш өсч түүхэндээ байхгүй өндөр боллоо. Мөн улсын төсөвт гурван удаа тодотгол хийсэн. 

4.   Шийдлийн Засгийн газар Монголын өрийг нэмэх гэж байна. Ч.Сайханбилэгийн Засгийн газар 850 сая долларын зээл гадны орноос нэмж авахаар хөөцөлдөж байна. 

5.  Авлигалтай тэмцэх ажилд ахиц гарсангүй. Засгийн газраас үндсэн хуулийн цэцийг хахуульдаж Лексус 570 маркийн машин өгсөн. Мөн сайд нь ажлын өрөөндөө авлигал авсан гэх мэт үе, үеийн засгийн газрын түүхэнд байхгүй үйлдлүүдийг гаргасан. Энэ мэт үндэслэлээр Ерөнхий сайдыг огцруулах саналд нэгдсэн гэв. 

Харин тус бүлгийн дэд дарга Д.Хаянхярваа “УИХ-ын дарга З.Энхболд чуулганы индэр ашиглан эрх, мэдлээ хэтрүүлэн ашиглаж байгаа. Тухайлбал, хуулийн төслүүдийг ялгаварлаж хэлэлцдэг мөн дэгийн хуулиар завсарлага өгдөггүй, гишүүдийн үг хэлэх эрхэнд халддаг, тэднийг элдвээр доромжилдог өөрт нь таалагдсан хуулийн төслийг хүлээж авдаг таалагдаагүйгээ хүлээж авдаггүй гэх мэт УИХ-ын даргад байж болохгүй ёс зүйгүй авирыг гаргаж байна. Тиймээс УИХ-д өөрийн саналаар огцрох ёстой гэсэн албан ёсны шаардлагыг хүргүүлж байгаа. Тухайлбал, Төрийн байгуулалтын байнгын хорооны хуралдааны ирц бүрдэхгүй байхад онгоцонд явж байгаа Н.Батцэрэг сайдыг байнгын хорооноос чөлөөлж оронд нь Г.Батхүү гишүүнийг оруулж хүч түрж асуудлыг шийдэх гэсэн. Энэ мэт хууль зөрчсөн үйлдлийг олноор гаргасан” гэлээ. 

Нийслэлийн мандатыг нэмэх асуудлаар тус бүлгийн дэд дарга Н.Номтойбаяр ярихдаа  "Хүн амын 45 хувь буюу 1.4 сая иргэн амьдарч байна. Тэдний төлөөлөл чамлалттай байна гэсэн асуудлыг З.Энхболд дарга тэргүүтнүүд ярьж байгаа. Энэний цаана намын нэрээр сонгогддог 28 гишүүн байдаг. Хувиар нь дүйцүүлж бодвол 14 суудал байгаа. Амьдрал дээр 28 гишүүн Улаанбаатар хотод ажиллаж амьдарч байгаа. Энэнтэй холбогдуулж зарим гишүүн санал гаргаж байгаа. Жагсаалтаар сонгогдсон гишүүдийн үндсэн ажил үүргийн хуваарь нь хэдийгээр улс орны хэмжээнд гэж байгаа боловч нийт хүн амаа хэрхэн төлөөлж ажиллаж байна вэ. Жишээ нь, өнгөрсөн дөрвөн жилийн хугацаанд жагсаалтаар сонгогдсон гишүүдээс нэг нь ч миний сонгогдсон тойрогт ажиллаж байгаагүй. Үлдсэн 28 гишүүний ажиллаж байгааг нь харвал ихэвчлэн гадаад руу явдаг. Тойргоос сонгогдсон нь төдийлөн гадаад томилолтоор явдаггүй. Намын нэрсийн жагсаалтаар сонгогдсон гишүүдээс хэд нь хууль санаачлав. Тойргоос сонгогдсон гишүүдийн санаачилж байгаа хууль, гаргая гэж байгаа шийдвэр нь иргэд сонгогчдоос өгсөн үүрэг даалгаварт тулгурлаж тойргоос сонгогдсон гишүүдийн бодлого үйл ажиллагаа удирдагдаж явдаг. Гэтэл жагсаалтын 28-ыг хэн удирдаж яаж яваад байна вэ гэх мэтчилэн анхаарах асуудал бий. 28 дотор улстөрчид зонхилж байна. Гэтэл мэргэжлийн салбарынхан орхигдож байна гэж санал гаргаж байна. Хотын инженер хүнс хөдөө аж ахуйн салбарын мэргэжлийн хүн байж яаагаад болохгүй гэж. Уул уурхай үйлдвэрлэл гэх мэт мэргэжлийн хүмүүсийн үүрэг оролцоо төрийн бодлогод дутагдаж байгаа зүйл бий. Үндсэндээ 28 нийслэлийг хариуцаж ажилладаг байгаа" гэлээ. 

МАН-ын бүлгээс уг асуудалтай холбогдуулан нийслэлийн иргэдээс судалгаа авсан байна. Энэ талаар С.Бямбацогт "Мандаттай холбоотой асуудлаар МАН нийслэлийн хэмжээнд 1000 иргэнийг оролцуулсан судалгаа хийсэн. "Аймгийн мандатыг цөөлж хотод нэмэгдүлэх асуудал ярих юм бол та дэмжих үү" гэж асуухад алслагдсан бүс нутаг эзгүйрч тэр хэрээр үндэсний тусгаар тогтнолд аюул занал учирна гэж оролцогчдын 43 хувь, үзсэн" гэлээ. 

Т.Хулан