Чуулганы хуралдаанаар Засгийн газраас өргөн мэдүүлсэн Хууль тогтоомжийн тухай хуульд өөрчлөлт оруулах тухай хуулийн төслийг хэлэлцэх эсэхийг хэлэлцээд гишүүдийн олонхийн саналаар дэмжиж анхны хэлэлцүүлэгт бэлтгүүлэхээр Хууль зүйн байнгын хороонд шилжүүллээ. Уг хуулиар УИХ-ын гишүүдийн хууль санаачилж, боловсруулж, өргөн барихтай холбоотой харилцааг зохицуулах юм.

УИХ-аар уг хуулийг 2015 оны зургадугаар сард баталсан бөгөөд хэрэгжих хугацааг 2016 оны долдугаар сарын 1-ны өдөр гэж зааж өгсөн юм. Тэгвэл Засгийн газраас уг хуулийг хэрэгжих хугацааг хойшлуулж 2017 оны нэгдүгээр сарын 1-ны өдрөөс эхлэн хэрэгжүүлэх саналыг боловсруулж УИХ-аар өргөн барьсаныг хэлэлцсэн нь энэ юм.

Хэлэлцэж буй асуудалтай холбогдуулан УИХ-ын гишүүд уг хуулийн төслийн хэрэгжих хугацааг хойшлуулж буйг дэмжих, дэмжихгүйгээ илэрхийлж саналаа хэлсэн юм.

Тухайлбал, УИХ-ын гишүүн Ц.Нямдорж, Б.Бат-Эрдэнэ, О.Баасанхүү, Д.Оюунхорол, Ч.Хүрэлбаатар нар уг хуулийн хэрэгжих хугацааг хойшлуулахыг дэмжихгүй байна гэв.

Тэд Засгийн газар уг хуультай холбоотой бүх зардлыг нь төсөвтөө суулгаад оруулаад ирэх учиртай. Одоо энэ хуулийг дараагийн засгийн газар хэрэгжүүлэхээр оруулж ирж байгаа нь буруу. УИХ аливаа хуулийг батлахдаа бүрэн эрхийнхээ хугацаанд хэрэгжиж эхлэхээр баталж байх ёстой. Тэгэж байж гишүүд баталж байгаа хуулиад дээрээ хариуцлагатай хандана. Засгийн газар нь хууль баталчихаад дараагийн Засгийн газраа хэрэгжүүл гэж байгаа нь буруу. Аль хэзээний бэлтгэл ажлаа хангаад төсвөө зохицуулсан байх ёстой гэв.

ЗГХЭГ-ын дарга С.Баярцогт хэлэхдээ хуулийг хэрэгжүүлэх бэлтгэл ажил нь хангагдаагүй. Хөрөнгө мөнгө нь төсөвтэй уялдаагүй байгаа учраас хойшлуулах хэрэгтэй байгаа гэлээ.

Харин УИХ-ын гишүүн Д.Хаянхярваа: Бид нарын байж байгаа байдал ийм байна. Санхүү хөрөнгөтэй холбоотой хууль гаргахдаа эдийн засгийн бодит боломжийг харж үздэггүй. Гүйцэлдүүлэх хөрөнгө санхүү байхгүй. Тиймээс хойшлуулахыг дэмжиж байна.

Т.Хулан