УИХ-ын гишүүн Г.Уянга нарын 19 гишүүн өнгөрсөн долоо хоногт Ерөнхий сайдыг огцруулах бичгийг УИХ-ын даргад өргөн барьсан. Тэгвэл уг асуудлыг  УИХ-ын Төрийн байгуулалтын байнгын хороо цаг сунган 100 хувийн ирцтэйгээр хуралдаж хэлэлцээд дэмжсэнгүй.

Энэ үеэр УИХ-ын гишүүн О.Баасанхүү Оюутолгойн төсөлд оруулсан татварын хяналт шалгалтын дүнд эргэлзээ байгаа эсэхийг тодруулахад "Эрдэнэс Оюу Толгой" ХХК-ийн гүйцэтгэх захирал Д.Ганболд, "Одоогоор Оюутолгой болон татварын албаны хооронд ямар нэг үл ойлголцол байхгүй. Зөрчил гэж үзэх 30 сая ам.долларын зөрчлийг Оюутолгой компани бүрэн төлж барагдуулсан" гэсэн тайлбар өгөв.

УИХ-ын гишүүн Г.Уянга тус төслийн хөрөнгө оруулалтын хэтрэлтийн асуудлыг лавласан. Уг асуултад "Эрдэнэс Оюу Толгой" ХХК-ийн гүйцэтгэх захирал Д.Ганболд, "Амьдрал дээр бодсон санаснаар өөр байдгийн нэг жишээ нь Оюутолгойн төсөл. Анхны ТЭЗҮ-г боловсруулж Эрдэс баялгийн зөвлөлд өгч байх үед 4 тэрбум ам.долларын хөрөнгө оруулалтаар бүх ажиллагаа явна гэсэн тооцоо гарч байсан. Эрдэс баялгийн зөвлөлд ТЭЗҮ-г өргөн барихын хамт ойрын үед ахин шинэтгэж оруулна гэсэн тохироог хоёр тал хийсэн. 2010 онд Эрдэс баялгийн зөвлөл ТЭЗҮ-гээ шинэчлэхийг хүссэн. Тухайн үед ТЭЗҮ-гээ заасан хугацаанд боловсруулж амжаагүй. Учир нь холбогдох нөхцөл байдал эрс өөрчлөгдсөн. Тиймээс Эрдэс баялгийн зөвлөл, Маргаан таслах зөвлөл судалж үзээд бодитойгоор 1,4 тэрбум долларын хэтрэлт гарсан нь гарцаагүй хэмээн дүгнэсэн. Энэ битгий хэл, үүнээс жижиг төсөл ч анхны хөрөнгө оруулалтаасаа хэтрэх явдал бишгүй байдаг. Хөрөнгө оруулалтын хэтрэлт нь Монголын Засгийн газрыг ч, хөрөнгө оруулагчдыг ч хохироож байгаа. Иймээс ноогдол ашиг авах хугацаа хойшлуулсаар байна" гэсэн юм.

Ерөнхий сайд Ч.Сайханбилэг мөн үеэр, "Засаг төр тогтвортой байвал эдийн засаг сэргэх бүрэн боломжтой. Монгол Улсын Засгийн газар, Ерөнхий сайд ажлаа хийгээд явж байна. Эрх зүйн бүрэн чадамжтай" гэсэн тайлбар хийв.

Мөн МАН-ын бүлгийн гишүүд Ерөнхий сайдыг хариуцлагагүй ажилласан хэмээн огцрох ёстой гэсэн юм.

Одоо чуулганы хуралдаанаар уг асуудлыг үргэлжлүүлэн хэлэлцэж байна. Яг одоо МАН-ын бүлгийн дарга С.Бямбацогт бүлгийнхээ огцруулах үндэслэлийг уншиж байгаа юм.

Т.Хулан