Долоо хоног бүрийн даваа гарагт УИХ дахь нам эвслийн бүлгүүд тухайн долоо хоногт хэлэлцэх асуудлын талаар байр сууриа нэгтгэж хуралддаг. Үүний дагуу УИХ дахь АН-ын бүлэг ээлжит хуралдаанаар хийжээ. Бүлгийн хуралдаанд Ерөнхий сайд оролцож Засгийн газрын өнгөрсөн хугацаанд хийсэн ажлын талаар мэдээлэл хийсэн байна. Засгийн газар өнгөрсөн нэг сарын хугацаанд НӨАТ-ын буцаан олголт, тэтгэврийн сан, Ипотекийн зээл, мөнгөний бодлогын хүүг бууруулсан, шинэ бонд гаргах асуудал гээд төлөвлөж байсан асуудлуудаа хэрэгжүүлж чадсан хэмээсэн байна. Түүнчлэн бүлгийн хуралдаанд АН-ын дарга З.Энхболд оролцсон бөгөөд намын дотоод асуудлын талаар ярилцсан учир дэлгэрэнгүй мэдээлэл өгөх боломжгүй гэдгийг АН-ын бүлгийн дарга Б.Гарамгайбаатар хэллээ. Үүнээс гадна өнгөрсөн долоо хоногт хэлэлцсэн сонгуулийн тойргийн асуудалд АН-ын бүлэг аль нэг байр суурийг нь дэмжсэн бодлого баримтлаагүй гэдгийг мөн бүлгийн дарга хэлсэн.

Тодруулбал, тэрбээр “Тойргийн асуудлаар сөрөг хүчин оноо авах зорилгоор тайлбарлаад байх шиг байна. Үнэндээ бол СЕХ-оос хоёр хувилбар орж ирсэн. Эхнийх нь сонгуулийн мандатыг 2012 оных хэвээр нь байлгах. Дараагийнх нь хотод тойрог нэмэх тогтоолын төсөл байсан. Энэ хоёр тогтоолын төслийг хоёулаа хүчинтэй гэж тайлбарласан. АН хоёр тогтоолын төсөл дээр аль алинд нь байр сууриа нэгтгэсэн байсан. Тэрнээс аль нэг байр суурийг нь бариад энэ дээр хатуу зогсоно гэж хэлээгүй” гэсэн юм. 

Үүний дараа сэтгүүлчдийн асуултад хариуллаа.

- Ерөнхий сайд Шадар сайдаар Н.Энхбаярыг томилох тохироо хийсэн гэх мэдээлэл байна. Эрүүл мэнд, спортын сайдыг томилохгүй асар их цаг алдаж байна. Бүлгийн хуралдаанаар энэ асуудал яригдсан уу?  

- Б.Гарамгайбатаар: -Бүлэг дээр тийм мэдээлэл өгөөгүй. Сайд томилох бол Засгийн газрын мэдлийн асуудал.

-МАН-ын бүлэг цагаан сарын өмнө хүүхдийн мөнгө, ипотек, малчны зээлийн хүүг бууруулах асуудлыг шийдэх ёстой гэсэн байр суурьтай байна. Танай бүлэг эдгээр асуудалд ямар байр суурьтай байна вэ?

-УИХ хуулийг нь баталсан. Ерөнхий сайдын бидэнд өгсөн мэдээллээр шийдэх бүрэн боломжтой гэсэн мэдээлэл өгсөн. Цагаан сарын өмнө буюу хоёрдугаар сард багтаан ипотек болон малчдын зээлийн асуудлыг шийднэ.

-ОХУ-аас шатахуун зээлээр авна гэдэг юу гэсэн үг вэ. Эдийн засаг ингэтлээ хэцүүдчихээ юу?  

-Ерөнхий сайдын бидэнд өгсөн мэдээллээр “Роснефть”-тэй хийсэн гэрээгээр шууд төлбөрийг нь хийхгүйгээр шатахуун авах боломжтой болсон.

-Зээлээр хэчнээн тонн шатахуун авах юм бол. Ямар шалтгаан байгаад зээлээр авах гээд байна вэ?

Ш.Түвдэндорж: -Өмнө нь бэлэн төлбөр хийж шатахуунаа авдаг байсан. Манай улсын хувьд эхний улиралд татварын орлого бага байдаг учраас гадагшаа өгөх доллар байдаггүй. Энэ үеэр төлбөрөө хийхгүйгээр зээлээр шатахуунаа авна гэсэн үг.

Т.Энхэлээ