УИХ-ын гишүүн Г.Батхүү АН-ын хамгийн хүчтэй гэгдэх "Алтангадас" фракцаас өрх тусгаарласнаа албан ёсоор зарлаад нэг жилийн хугацаа өнгөрчээ.

Тэрбээр "Алтан гадас"-аас татгалзсан шалтгаанаа “А.Бакей гишүүн бид хоёр фракцгүй намын зорилгыг бичээд бүх фракцад тараасан. Харамсалтай нь нэг нь ч хариу ирүүлээгүй. Тэгэхээр нь “Алтангадас” фракцаасаа гарсан. Одоо сүүлдээ фракцийн дарга нар хуралдаж аливаа шийдвэрийг гаргадаг, фракцийнхний бичгээр өгсөн саналын дагуу сайд нар нэр дэвшдэг байдал руу явж байна. Аль ч намын дүрэм, аль ч хуульд байхгүй энэ бүтэц хамгийн хүчтэй бүтэц болж байгаа нь  байж боломгүй зүйл. Өнөөдөр хараад байхад АН-ыг бүрдүүлж байгаа намуудын угшил дагасан фракцууд түлхүү байгаа нь ажиглагддаг. Энэ бол АН-ын нэг зовлон, сул тал. Гэхдээ намуудын угшил харьцангуй бүдгэрч байгаа. Би шинээр фракц байгуулаагүй. Харин санаачилга гаргасан. Санаачилга бол ямар нэг фракц шиг хэн нэгнийгээ дарга сайд болгохын төлөө ч юм уу, хэн нэгнийхээ эрх ашгийн төлөө үйлчилдэг байгууллага биш. Бид мөн тодорхойлсон зарчмууд дээрээ нэгдээд, үүнд мөн нэгдэж байгаа ямар ч хүмүүсийг элсэж орох боломжийг нээж байгаа. Санаачилга бол ямар нэг фракц шиг хэн нэгнийгээ дарга сайд болгохын төлөө ч юм уу эрх ашгийн төлөө үйлчилдэг байгууллага биш” гэж тайлбарласан билээ.

Г.Батхүүгийн шинэ фракцад УИХ-ын гишүүн Ц.Оюунгэрэл, Ш.Түвдэндорж, Л.Болд, А.Бакей болон Ерөнхий сайдын зөвлөх Б.Батбаатар нар нэгдсэн сурагтай. Тэдний фракцийг АН-ын нөхөд нь “АПУ”-ийн фракц хэмээн егөөдөж байгаа аж.

Хэдийгээр тэрбээр өөрийгөө фракц байгуулаагүй зөвхөн санаачилга гаргасан гэж өнөөдрийг хүртэл ярьж ирсэн ч түүнийг АН дотор шинээр бүлэг байгуулсан гэдгийг эх сурвалж хэлж байгаа. Түүгээр зогсохгүй түүний байгуулсан шинэ фракц одооноос хүчээ авч, үйл ажиллагаагаа идэвхтэй явуулж эхэлж байгаа гэнэ. Хэвлэл, мэдээллийн хэрэгсэлд түүнийг “Чандмань” нэртэй фракц байгуулсан хэмээн бичиж байсан. Тус фракцийн нэр эцсийн байдлаар тодорхой болж олон нийтэд тараагүй ч ихээхэн нууцаар үйл ажиллагаагаа явуулж байгаа сурагтай. Тэд сонгуулийн үеэр улам идэвхжиж ажиллахаар бэлтгэж явна.

Г.Батхүүгийн шинэ фракцад УИХ-ын гишүүн Ц.Оюунгэрэл, Ш.Түвдэндорж, Л.Болд, А.Бакей болон Ерөнхий сайдын зөвлөх Б.Батбаатар нар нэгдсэн сурагтай. Тэдний фракцийг АН-ын нөхөд нь “АПУ”-ийн фракц хэмээн егөөдөж байгаа аж.

АН-ын “Алтангадас” фракцийн гол санхүүжүүлэгч, ноён нурууных нь нэг гэгдэж ирсэн Г.Батхүү 2012 оны сонгуулийн өмнө “Чандмань” нэртэй клуб байгуулан үйл ажиллагаа явуулж эхэлсэн тухай тэр үед мэдээлэгдэж байсан. Тухайн үед Г.Батхүү “Энэ бол зүгээр л клуб” гэж байсан ч улстөрд өөрийн гэсэн багаа бүрдүүлэх зорилго агуулж байсан нь ойлгомжтой байдаг.

Гэвч УИХ-ын сонгуульд дандаа сонгогдож ирсэн Өвөрхангайдаа унаж орхисон. Гэхдээ нам нь сонгуульд бага зэрэг илүүрхсэн болон мөнгөтэй баян хүнийхээ хувиар шүүхийн шийдвэрээр дахин УИХ-д заларч амжсан. Ингээд гишүүн болсноосоо хойш жил хагасыг хэзээ өөрийг нь унагахаас айж суусан гэх.

Түүний ийнхүү шинэ фракц үүсгэсэн нь шинээр байгуулагдсан Зам тээвэр, барилга хот байгуулалтын яамны сайд болох гэтэл болгоогүйтэй холбоотой амбицаас үүдэлтэй гэж хүмүүс ярьдаг.

Ийнхүү АН доторх тав дахь фракц үйл ажиллагаагаа идэвхжүүлж эхэлж байна. Уг нь тус намын дарга З.Энхболд өнгөрсөн онд АН-ыг фракцигүй нам болсон хэмээн зарласан боловч намын нөхдүүд нь ил далдаар ийнхүү фракци байгуулан сонгуулийнхаа ажиллагааг эхэлүүлээд байна. Тэгэхээр намын дарга З.Энхболдын хэлсэн "АН фракцигүй нам боллоо" гэх үг, үг биш болж үнэ цэнээ алдсан бололтой. Мөнгөтэй эрх мэдэлтэй л бол намын даргын үгийг үгүйсгэж, улс төрийн талбарыг эрх дураараа тонгочих талбар болгож болгож буй нөхдүүдэд намын дарга нь хэрхэн хандах нь сонирхол татаж байна. Өөрөөр хэлбэл айсуй сонгуулийн мандат олгох, цаашилбал албан тушаалд дэвшүүлэх гэх зэргээр хариуцлага тооцох сэдэвүүд олон. Харин АН-ын дарга З.Энхболд үгийг нь үгүйсгэсэн нөхдөө хэрхэх бол.

Т.Энхэлээ