УИХ-ын дарга З.Энхболд ээлжит бус чуулганыг яарч, сандран хуралдуулан байж Үндсэн хуулийн цэцийн даргыг огцруулсан. Сая нэг санаагаа амраасан спикер Ж.Амарсанаагийн оронд Үндсэн хуулийн цэцийн даргаар хэнийг томилох вэ? гэдэг асуудлаар ойрын өдрүүдэд нэлээн толгойгоо гашилгаж буй сурагтай. Уг нь УИХ-ын гишүүн Р.Гончигдоржийг гишүүнээс нь чөлөөлөөд, Цэцийн даргаар томилно гэх мэдээлэл байсан.
Үндсэн хуулийн цэцийн дарга асан Ж.Амарсанаа хүртэл энэ талаар “Цэцэд их хурлын төлөөний хүмүүс ажилладаг болсон. Тэр хүмүүс Р.Гончигдоржийг дарга болонгуут ирэх хавар УИХ-ын сонгууль боллоо гэхэд тус хуулиар маргаан үүсвэл Их хурлын зөв гэж шийдвэр гаргаж ажиллана” гэж байв. Хэрвээ УИХ-ын гишүүн Р.Гончигдорж Үндсэн хуулийн цэцийн даргаар томилогдвол Худалдаа Хөгжлийн банкны захирал Б.Мэдрээ үлдсэн богино хугацаанд УИХ-ын гишүүн болж үзэх нь.
Гэхдээ Р.Гончигдоржоос илүү З.Нарантуяаг Цэцийн даргаар томилох магадлал өндөр байгаа гэнэ. З.Нарантуяагийн хувьд УИХ-ын дарга З.Энхболдын “хүн” гэгддэг бөгөөд Санхүүгийн зохицуулах хорооны даргаар ажиллаж байгаад өнгөрсөн нэгдүгээр сард ажлаа хүлээлгэн өгсөн юм. Тэрбээр ажлаасаа чөлөөлөгдөх хүсэлтээ өгөхдөө Сонгуулийн тухай хуулийн 126 дугаар зүйлийн 126.5 дахь хэсэг, Төрийн албаны тухай хуулийн 23 дугаар зүйлийн 23.2 дахь хэсэгт тус, тус үндэслэсэн гэдэг. Түүнийг чөлөөлж өгөхийг УИХ-ын дарга З.Энхболд өөрөө гишүүдэд танилцуулж хүсч сүрхий юм болж байв.
Тэгвэл түүний дараагийн зогсоол УИХ-д хүч үзэх бус Үндсэн хуулийн цэцийн дарга болж магадгүй боллоо. Магадгүй түүнийг Үндсэн хуулийн цэцийн даргаар томилохоор л ажлаас нь чөлөөлсөн байж мэднэ. УИХ-ын дарга З.Энхболд өөрийн ойрын хүн З.Нарантуяаг Цэцийн дарга болгоход асуудалгүй байх нь мэдээж.
З.Нарантуяа нь 1984-1991 онд ОХУ-ын Эрхүү хотын Улсын их сургуулийг хуульч, эрхзүйч мэргэжлээр, 1997-1999 онд Санхүү, эдийн засгийн дээд сургуулийг Санхүүч-эдийн засагч мэргэжлээр тус тус суралцан төгссөн байна.
1995 онд Эрхүү хотын Улсын их сургуульд эрх зүйн магистр, 2004-2005 онд АНУ-ын Нью Иорк хотод Колумбын их сургуулийн Олон улсын сургуульд олон улсын эдийн засгийн ухааны магистр цол хамгаалсан. 1992-2006 онд Төв банк /Монголбанк/-нд мэргэжилтэн, ахлах мэргэжилтэн, хэлтсийн захирлын үүрэг гүйцэтгэгч, газрын орлогч захирлаар, 2006-2010 онд “Монгол шуудан” банкны дэд захирал, “Хадгаламж” банкны Гүйцэтгэх захирлын орлогчоор, 2011-2012 онд “Парита энд Партнерс” хууль, хөрөнгө оруулалт, санхүүгийн зөвлөх компанийн үүсгэн байгуулагч, Ерөнхий захирлаар ажиллаж байсан бөгөөд 2012 оноос УИХ-ын даргын Эдийн засгийн бодлогын зөвлөхөөр ажиллаж иржээ.
2008 онд АН-аас Завхан аймагт УИХ-ын сонгуульд нэр дэвшиж байсан ч ялагдсан. Харин 2012 оны сонгуулиар АН-ын жагсаалтын 19-т эрэмбэлэгдэж байжээ.
Ямартай ч З.Энхболд Үндсэн хуулийн Цэцийн даргыг өлхөн явуулсан шигээ З.Нарантуяаг зовлонгүй томилж чадахаар байна. АН-д Үндсэн хуулийн цэцийн асуудлаар дахин хүч түрэхэд болохгүй гэх газаргүй. З.Энхболд өөрийн хүн гэгдэх З.Нарантуяаг Үндсэн хуулийн цэцийн даргаар томилж чадвал өөрийнх нь эрх мэдэл улам өргөжиж, хариуцлага хүлээдэггүй болж мэднэ гэж ярих хүмүүс байна.
Т.Энхэлээ
Сэтгэгдэл (54)