Ирэх сонгуулийн өнгө төрх өдөр ирэх тутам тодорсоор. АН энэ сардаа багтаан ҮЗХ-оо хуралдуулж сонгуульд нэр дэвшигчдийн нэрсийг товлох бол МАН-ын дотооддоо уг асуудлаар нухацтай ярилцаж буй сурагтай. Эх сурвалжийн мэдээлж буйгаар сонгуульд нэр дэвших эрхийн төлөөх ширүүн тулаан намуудад нилээн хүчтэй явагдаж байгаа гэнэ. Нам доторх өрсөлдөөн ширүүсч сонгууль ойртох тусам улс төр тойрсон асуудлууд ар, араасаа цуварч гарч ирэх нь тодорхой байна. Намын удирдлагууд хэнийг сонгуульд нэр дэвшүүлэх вэ?, хэнийг жагсаалтад оруулах вэ зэрэг асуудлыг ч ярилцаж эхэлжээ.

Парламентад сөрөг хүчин болон ажиллаж буй МАН-ын хувьд ирэх сонгуульд олон жил УИХ-д сонгогдсон, туршлагатай улс төрчдөө жагсаалтаар харин залуусаа тойрогт өрсөлдүүлэхээр ярьж буй аж. Нийслэлийн МАН-ын хоёрдугаар хуралдаан өнгөрсөн амралтын өдөр хаалттай болж уг асуудлаар өргөн хүрээтэй хэлэлцүүлэг өрнүүлжээ. Тодруулбал, МАН-ын эрх мэдэл бүхий хүмүүс болон гишүүд дэмжигчид нь ирж яваа цагийн залуу лидерүүдээ бусад намын адилаар массаараа дэмжих хэрэгтэйг тус хуралдаанд оролцсон төлөөлөгчид дурдсан байна. Тухайлбал, Нийслэлийн МАН-ын хорооны дарга Ц.Сандуй, НАМЗХ-ны ерөнхийлөгч Г.Тэмүүлэн, УИХ-ын гишүүн О.Содбилэг нарын залуучуудаа дэмжиж ажиллахыг онцолжээ. Тус нам нэр цэвэр, залуу боловсон хүчнүүдээ хөдөөд гэхээсээ илүүтэйгээр нийслэлд сойх нь илүү үр дүнтэй гэж үзэж байгаа аж. Тэгэхээр МАН 2016 онд нийслэлд ялалт байгуулж ИТХ-д олон суудалтай болно гэх горьдлого тээж буй бололтой.

Нийслэлд МАН-ын сүүлийн 20 орчим жил хийгээгүй бүтээн байгуулалтыг дөрвөн жилийн хугацаанд хийсэн гэх АН-ын эсрэг МАН ийнхүү зоригтой хөдлөх болсон шалтгаан нь тус намын чансаа нийслэлд 32.5 хувь гарсантай холбоотой аж. Уг тоо нь МАН-ыг нийслэлчүүдэд маш өндөр нэр хүндтэй байгааг илэрхийлэх бөгөөд үүнд л гол найдлагаа тавьж буй нь тодорхой байна.

Эх сурвалжийн мэдээлж буйгаар МАН-ын нийслэлийн хорооныхон ирэх сонгуулиар “Аз жаргалтай хот” хэмээх бодлогын баримт бичгийн дагуу ажиллах гэнэ. Нэг үгээр хэлбэл, тэд ийм уриатайгаар сонгуульд өрсөлдөнө гэсэн үг. Тэд мөн “Бид хамтдаа” мөрийн хөтөлбөрийн үр дүнг зөв дүгнэж хэлэлцэх ёстой гэж үзэж байгаа аж.

Өнгөрсөн хугацаанд “хөдөөний нам” гэх нэр зүүтлээ хөдөөд ялалт байгуулж байсан МАН-ынхан энэ удаад нийслэлийг онилсон нь сонгуулийн өмнөх үйл явдлыг сонирхолтойгоор эргүүллээ. Дээрхээс гадна МАН-аас шинэ хүн олноор нэр дэвших гэнэ. Тухайлбал, Монгол тулгатны 100 эрхэм нэвтрүүлгийн хөтлөгч П.Анужин УИХ-ын сонгуульд нэр дэвшихээр бэлтгэл ажилдаа оржээ. Цаашилбал, бие даагч Х.Болорчулуун гишүүн МАН-д элсэж, Дорнодод нэр дэвшинэ. Энэ мэт сонин, содон үйл явдлаар дүүрэн 2016 оны сонгууль ойртсоор байна.

Сонгууль тойрсон асуудлаар АН-ынхан дотооддоо хэрхэн бужигнаж буйг бид дараагийн удаа хүргэх болно.

Т.Хулан