ХҮН-ын удирлагын асуудал улам хурцдаж, шинэ даргатай болжээ. Хөдөлмөрийн Үндэсний намын Төв хорооны хурал өнөөдөр болж, нам дотроо үүсээд байгаа асуудлын талаар ярилцаж, намын дарга УИХ-ын гишүүн С.Ганбаатарыг албан тушаалаас нь огцруулсан байна.

Харин түүнийг огцруулах хуралд С.Ганбаатар ирээгүй бөгөөд намын төв хорооны гишүүдийн 67 хувийн саналаар Б.Найдалаа сонгогдож, намын тамга, тэмдгээ гардан авсан талаар тус намын хэсэг хүмүүс мэдээлэв. 

Энэ үеэр тус намын Ерөнхий нарийн бичгийн дарга асан Д.Доржханд “Хөдөлмөрийн Үндэсний нам ёс зүйтэй нам. Монгол улсад институцийг бий болгох, дүрэм журмаа сахиж ажиллана гэсэн итгэл үнэмшилтэй. Тэрнийхээ хүрээнд намын дүрэм журмын дагуу холбогдох албан тушаалтнуудад хариуцлага хүлээлгэх асуудлыг өнөөдрийн хурлаар хэлэлцлээ. Хурлын хүрээнд ХҮ намын дарга С.Ганбаатарын асуудлыг хэлэлцэж намын даргын албан тушаалаас түдгэлзүүлэх шийдвэр гаргалаа. Мөн 2016 оны сонгуульд ажиллах багийг өнөөдрийн хуралдаанаар баталгаажууллаа” гэсэн юм.

Гэтэл баттай эх сурвалжийн мэдээлж буйгаар ХҮН-ын өнөөдрийн намын Төв хорооны хурал нь хүчин төгөлдөр бус бөгөөд С.Ганбаатарыг огцруулсан асуудал байхгүй гэдгийг мэдээлэв. Түүнчлэн хууль бус хурал зохион байгуулж, хууль бус үйлдэл гаргасан нөхдүүдтэй холбоотой асуудлаар хуулийн байгууллагад хандана гэдгээ ч мөн мэдэгдэв.