МАН, МАХН 95 жилийн ойн баяраа хамтран тэмдэглэсэн нь ирэх сонгуульд чимээ өгсөн үйл явдал болов. Үүгээрээ тус хоёр нам 2016 оны УИХ-ын сонгуульд эвсч орохоо албан бусаар зарлалаа. Таван жилийн турш хагаралдаж байсан намын удирдлагууд гар барьж, эвлэрсэн нь эрх баригч АН-ыг хүртэл сандаргаад авав. АН-ын дарга З.Энхболд сонгуульд МАН, МАХН-ын эсрэг ганцаараа орвол ялагдал хүлээнэ гэдгээ мэдэж буй учир ИЗНН, МҮАН-тай нэгдэх ажлыг яаравчилж буй сураг байна. Энэ бүхнээс харахад МАН+МАХН, АН+ИЗНН, МҮАН гэсэн хувилбарууд ирэх сонгуулийн өнгө төрхийг тодорхойлохоор байгаа юм.

Эвсэх асуудлаар МАХН-ын дарга Н.Энхбаяр “Хоёр нам нэгдэх тухай яриа хууль эрх зүйн талаасаа ч бэлтгэл ажлын талаасаа ч цаг хугацааны хувьд боломжгүй болсон гэдгийг хаа, хаанаа ойлгож байгаа. Харин УИХ, орон нутгийн сонгуульд эвсэн нэг субьект болж оролцох боломж нээлттэй байгаа” гэсэн бол МАН-ын дарга М.Энхболд энэ талаар ямар нэгэн үг хэлээгүй юм.

Үүнээс үзвэл хоёр намыг эвсүүлэх сонирхол МАХН-ын дарга Н.Энхбаярт илүү байна гэж харж болохоор байгаа. Ер нь хоёр намыг нэгтгэх асуудлыг МАХН л эхэлж хөндсөн. Баяраа хамт тэмдэглэх саналыг ч анх тус нам гаргасан шүү дээ. Тэгэхээр эвсэх асуудлаар М.Энхболд илүү их бодож, Н.Энхбаяр хүлээх өдрүүд үргэлжлэх нь.  

Хоёр нам нэгдэх асуудал яригдаж эхлэх үед хүмүүс “М.Энхболд Н.Энхбаярыг хүлээж авахгүй. Нэгэн цагт өөрийг нь яаж тонгорч байлаа. Мөн Н.Энхбаярын нэр АТГ-аас салахаа больсон. Одоо ч тус газарт шалгагдаж байгаа. Хээль, хахууль, гэмт хэрэгт холбогдож дуусдаггүй хүнтэй хамтрах нь МАН-ын нэр хүндэд сөргөөр нөлөөлнө” гэх мэтээр ярьж байсан. Гэтэл М.Энхболд хаяад явсан Н.Энхбаярыг өөртөө нэгтгэж, өөд нь татаж буй нь сонгуулийн өмнөх улс төрийн тоглолтоо эхлүүлэв үү гэж харахад хүргэж байна. Мөн ханилж явсан нөхрөө хүнд хэцүү цагт нь түшиж авч байна гэх яриа ч байна. Хамгийн сүүлийн мэдээллээр Н.Энхбаяртай холбоотой 500 сая төгрөгийн хэрэг сөхөгдөж АТГ-аас түүнийг шалгаж эхэлсэн гэж буй. Намынх нь Ерөнхий нарийн бичгийн дарга өөрийг нь авлигалын хэрэгт холбоотой гэж зарласнаас эхлээд түүнийг нээнтэглэх олон зүйл хууль, хяналтын байгууллагад байна. АТГ-ын овоо хараанд өртсөн Н.Энхбаярын хувьд үнэхээр хүндхэн нөхцөл байдалтай байгаа гэж хэлж болно. Тиймээс тэрбээр асуудал хурцдахаас өмнө намаа МАН-ын хаяаг түшүүлж, унаж буй нэр хүндээ сэргээх гэж зүтгэж байна хэмээн олон нийт харж байна.

МАН-ын ерөнхий нарийн бичгийн дарга Ж.Мөнхбат “Эдийн засаг хямарсан, улс орон хүнд байдалд орсон энэ үед улс төрийн намуудад харилцан ойлголцол, үндэсний зөвшилцөл юу юунаас чухал” гэсэн байр суурь илэрхийлсэн. Мөн тус намын Ерөнхий нарийн бичгийн дарга С.Бямбацогт “МАХН хамтарч сонгуульд оръё гэвэл бид татгалзахгүй. Улс орныхоо том эрх ашгийг урьдаа тавиад явбал болохгүй зүйл байхгүй” гэж хэлсэн нь ч мөн тус хоёр нам эвсч, эвлэрэхэд тун ойртжээ гэдэг утгыг илэрхийлж буй.

Гэхдээ тус хоёр нам нэгдсэн нь МАХН-д илүү ашигтай гэж улс төрийн хүрээнийхэн харж байгаа. Учир нь МАХН-ын рейтинг өдөр ирэх бүр унаж байгаа. Тиймээс том намын өвөрт орохгүй бол ирэх сонгуулиар эерэг үр дүн горьдоод нэмэргүй. Харин МАН дотроо том дайсантай болох эрсдэл байгаа гэдгийг хэлэх хүн олон байгаа юм.  Харин тус хоёр нам нэгдсэнээр ард түмэнд ямар ашигтайг ирэх он жилүүд харуулах биз ээ.

Т.Энхэлээ