“Сайдын цаг” уулзалтад Байгаль орчин, ногоон хөгжил, аялал жуулчлалын сайд Н.Батцэрэг оролцож, хийж хэрэгжүүлсэн болон хийхээр төлөвлөж буй ажлуудынхаа талаар мэдээлэл хийлээ.

Ногоон хөгжлийн бодлогыг хэрэгжүүлэх үйл ажиллагааны болон “Хог хаягдлын менежментийг сайжруулах үндэсний хөтөлбөр”-ийг хэрэгжүүлэх үйл ажиллагааны төлөвлөгөөг батлан хэрэгжүүлж байна. Усны сав газруудын хэмжээнд 2015 онд хийсэн гадаргын усны тоо бүртгэлийн тайлан мэдээг нэгтгэн боловсруулж, Улсын усны мэдээллийн санд хүлээлгэн өгсөн. Нийслэлийн агаарын бохирдлыг бууруулах хүрээнд “Clean coal” түүхий нүүрс цэвэршүүлэгч уусмалыг амжилттай туршин, Хан-Уул дүүргийн 300 айлд тарааж, хэсгийн ахлагч нарт сургалт зохион байгуулсан гэж БОНХАЖ-ын сайд Н.Батцэрэг хэллээ. Мөн Сэлэнгэ аймгийн Мандал сумын нутагт орших Ноён уул орчмын газар нутгийг УИХ-ын тогтоолоор Улсын тусгай хамгаалалтад авч, тусгай хамгаалалттай газар нутгийн хэмжээг 0.04 хувиар нэмэгдүүлснийг онцолсон юм.  2016 онд салбарын эрх зүйн орчныг боловсронгуй болгох чиглэлээр холбогдох хуулийн төслүүдийг боловсруулж байна. Тосон Бумбын нуруу, Дэлгэрхаан уул, Цагаан дэглийн агуй зэрэг нийт 1,84 сая га талбайг хамарсан газар нутгийг улсын тусгай хамгаалалтад авах саналыг Улсын Их Хуралд өргөн мэдүүлнэ, "Ойн цэвэрлэгээ хөтөлбөр"-ийн хүрээнд ойг эдийн засгийн эргэлтэд оруулж, 32 мянган га ойг цэвэрлэн,1590 га талбайг улсын болон орон нутгийн төсвөөр ойжуулах ажлыг хийнэ. Мөн АСЕМ-ийн дээд түвшний уулзалттай холбогдуулан хурлын зохион байгуулагч, менежер, зочид буудлын менежер, сургагч багш бэлтгэх сургалтыг зохион байгуулж, чадавхжуулах, зочид буудлуудад зэрэглэл тогтоох ажлыг хийж байна гэлээ.

Мэдээллийн дараа сэтгүүлчдийн сонирхсон асуултад хариуллаа.

-Сонгуулийн хуульд нэмэлт өөрчлөлт оруулах төсөл өргөн барих гэж байна гэсэн. Намын жагсаалтын 28 квотоос зургааг нь нийслэлтийн мандат дээр нэмэх асуудал яригдаж байгаа. Танай бүлэг үүн дээр ямар байр суурьтай байна вэ?

-Засгийн газрын хуралдаан дээр Ш.Түвдэндорж гишүүн энэ талаар ярьсан байна лээ. Засгийн газраас санал асуусан юм билээ. Засгийн газар тухайлан өгөх саналгүй. Манай бүлэг энэ асуудлаар хуралдаж, байр сууриа гаргаагүй байна.

-"Шударга ёс" эвслийн бүлгийн даргаар УИХ-ын гишүүн Ч.Улааныг томилно гэсэн мэдээлэл байна. Бүлгийн даргыг солих талаар бүлгээр хэлэлцсэн үү?

-Бүлэг дээр энэ асуудлыг яриагүй. Засгийн газрын гишүүнээр томилогдсоны дараа би хоёр намын даргад бүлгийн даргын ажлаа өгөх саналаа хэлсэн. Гэтэл улс төрийн нөхцөл байдлаас шалтгаалан намайг бүлгийн даргын ажлаа хийж бай гэсэн чиглэл өгсөн. Хэрвээ бүлгээр бүлгийн даргыг солих асуудлыг хэлэлцвэл би ажлаа өгөхөд бэлэн. Зарим тохиолдолд Засгийн газрын эрх ашиг бүлгийн улс төрийн сонирхол хоёр ямар нэгэн байдлаар зөрчилддөг.

-МҮАН-д АН нэгдэх санал тавьсан. Энэ асуудлыг танай нам дотроо хэлэлцсэн үү?

-АН-аас манай намд 2016 оны сонгуульд нэгдэн орох санал өгсөн. Энэ саналыг бид судалж үзсэн. Намын удирдах зөвлөлийн хүрээнд яриад намын дарга "нэгдэн орох бололцоогүй, харин хамтрах боломжтой" гэсэн хариу өгсөн. Намрын чуулган эхлэхэд ямар байдлаар сонгуульд оролцох вэ гэдгээ эцсийн байдлаар шийднэ.

Т.Энхэлээ