Б.Найдалаагаар удирдуулсан ХҮН-ын Төв хороо өчигдөр хуралдаж намын дарга С.Ганбаатарыгаа огцруулсан. Тэгвэл ХҮН-ын дарга С.Ганбаатар тэдний уг шийдвэрийг хууль бус хэмээн үзэж өнөөдөр дахин төв хорооны хуралдааныг зохион байгуулж өчигдөр намын даргаар сонгогдсон Б.Найдалааг ажлаас нь чөлөөлсөн юм. Ийнхүү ХҮН хуваагдан хоёр өөр газарт хуралдаж бие, биенийгээ огцруулж байна.

Харин өнөөдөр ХҮН-ын огцорсон дарга гэх С.Ганбаатар “MN” мэдээллийн төвд хэвлэлийн хурал хийн болж буй үйл явдлын талаар "Бусад намын бууны нохой, явуулга" гэхээс өөр тайлбар хэлж чадсангүй. Тэрбээр сэтгүүлчдийн асуултад хариулахдаа  "Миний зөв. Дүрмийн бус үйлдэлд ард түмэн сонгуулиар дүн тавина" гэж амлав. Ингэхдээ Алтан Дорнод компанийн хамгаалагчдаар хаалга үүдээ хамгаалуулж хэвлэлийн хурлаа хийсэн юм.  Мөн хэвлэлийн бага хурлаа арайхийн дуусгаад хамгаалагчдаараа хүрээлүүлэн зугатаан гарлаа. Хоёрхон сарын өмнө хамт зогсож, хамтран ажиллах төлөвлөгөөгөө ярьж байсан тэрбээр төрөл арилжсан мэт аашилж намын бусад гишүүдтэйгээ үг ч солилгүй гарч одсон нь гайхшрал төрүүлсэн. Жижигхэн намын дотоод асуудлыг шийдэж чадалгүй хувааж хаяад нэг талтай нь хүзүү сээрээ холбосон түүнд Монголын ард түмний хувь заяаг даатгах уу, эс даатгах уу? гэж намын зарим нөхөд н энэ үеэр хэлэв.  Харин ХҮН-ын дэд дарга Ж.Лхагвасүрэн  “ХҮН-д үүсээд буй энэ асуудлыг шийдэхээр Улсын Дээд Шүүхэд хандсан” хэмээгээд ХҮН-ын хэвлэлийн хуралд өөрсдийг нь оролцуулахгүй байгааг онцоллоо.