Иргэдийн дунд хүлээлт үүсгээд байсан орон сууцны 5 хувийн зээлийн журмыг өнгөрсөн баасан гаригт Засгийн газрын хуралдаанаар баталлаа. Ингэснээр иргэд бага хүүтэй зээлээр байртай болох боломжтой болж байна. Гэхдээ уг журам хэзээнээс хэрэгжиж, иргэдийн амьдралд бодитойгоор үр дүнгээ өгөх нь одоогоор тодорхойгүй байгаа юм.

Уг журам батлагдсаны маргааш УИХ-ын дарга З.Энхболд Өмнөговьд очиж, иргэдтэй уулзах үеэрээ “21 аймагт ипотекийн зээлийн хүү 5 хувь боллоо” хэмээн ярив. Тэрбээр цаашид АН-ын даргын хувьд сонгууль угтсан уулзалтуудаараа үүнийг л голлон ярина. Тэгэхээр хүлээлт үүсгэсэн уг журам хэрэгжих, хэрэгжихгүйн аль нь ч байсан АН-ын ирэх сонгуулийн шоу энэ болох нь тодорхой байна. Тодруулбал, тус нам орон сууцны зээлийн хүүг бууруулснаараа ирэх сонгуульд иргэдээс өндөр үнэлгээ авна гэж тооцоолжээ. Хэрвээ орон сууцны зээлийг хүүг 5 хувь болгочихвол АН-ын чөтгөр байсан ч сонгоё гэж иргэд ярьж байхад тэд үүнийг ашиглахгүй өнгөрч болно гэж үү.

Хамгийн гол нь уг журмыг голлон хэрэгжүүлж, хөрөнгө санхүүгийн асуудлыг шийдвэрлэх Монгол банкны зүгээс 5 хувийн зээлийг хэрэгжүүлэхэд хүндрэлтэй. Эдийн засгийн нөхцөл байдлаас шалтгаалан үүнийг хэрэгжүүлэх боломж тун хэцүү гэх утга бүхий мэдээллийг өгч байгаа.

Харин Барилга хот, байгуулалтын сайд З.Баянсэлэнгэ “Журмыг баталсан. Одоо Сангийн яам, Монгол банк хэрэгжүүлэх ёстой” гэсэн тайлбарыг хэлж байгаа юм.

Гэтэл Сангийн сайд нь Гадаадын хөрөнгө оруулалт маш бага. Төсөвт зайлшгүй тодотгол хийх шаардлагатай” гэсэн зүйлийг ярьж байна.

Хэрвээ журам хэрэгжиж эхэлбэл, Улаанбаатар хотын гэр хорооллын дахин төлөвлөлтийн болон шинэ суурьшилын бүс, нийслэлийн алсагдсан гурван дүүрэг, орон нутгийн 21 аймгийн нутаг дэвсгэрт орон сууц худалдан авах иргэдэд таван хувийн хүүтэй зээл олгох юм байна.

Ямартай ч гадаадын хөрөнгө оруулалт буурч валютын ханш өссөн, төсвийн орлого багассан энэ үед орон сууцны 5 хувийн зээлийг хэрэгжүүлэх нь тун хэцүү гэх мэдээллийн эдийн засагчид өгч байна. Харин АН-ынхан ямар санхүүжилт, эдийн засгийн чадавхиар энэхүү журмыг хэрэгжүүлэх эсэх нь сонин байгаа юм. Тиймээс орон сууцны 5 хувийн зээл өнөөдрийн нөхцөлд хол, хөндий сонсогдож буй. Одоогоор сар тутам эргэн төлөгдөж байгаа 22 гаран тэрбум нь шинээр олгож байгаа зээлээс хоёр дахин бага. 5% болохоор шинээр олгох дүн улам нэмэгдэж, бага хүүтэй, урт хугацаатай зээл тул энэ зай улам холдоно. Бага хүү, бага урдчилгаагаар зээлийн чадавхигүй иргэдийг ипотекийн зээлийн багцад сонгууль хүртэл торгоогоод тэр нь эргээд санхүүгийн салбараа дарж унах эрсдэл харагдаж эхэллээ. Үл хөдлөхийн үнэд уяатай хувийн салбарууд нь үүнд өртөж дампуурч мэдэх нөхцөл ч үүснэ.  Ард нийтээрээ хүүг нь багасгасан үнэтэй хөрөнгийг 20, 30 жилээр нугалж төлөх тийм л байдал үүнээс харагдаж байна.

Ямартай ч дээрх шийдвэрүүд болон хуулийн төслүүд дэмжигдэж чадвал орон сууцанд орохоор хүлээж буй болон найман хувийн зээлтэй олон мянган иргэд ихээхэн өгөөжтэй шийдвэр болж иргэдээс “онц” гэсэн үнэлгээ авна даа. Харин эсрэгээрээ энэхүү ярьсан  зүйлээ УИХ-ын сонгуулийг угтаж шоу хийж байгаа бол үнэхээр эмгэнэл.

Хэрвээ журам хэрэгжиж эхэлбэл, Улаанбаатар хотын гэр хорооллын дахин төлөвлөлтийн болон шинэ суурьшилын бүс, нийслэлийн алсагдсан гурван дүүрэг, орон нутгийн 21 аймгийн нутаг дэвсгэрт орон сууц худалдан авах иргэдэд таван хувийн хүүтэй зээл олгох юм байна. Улмаар найман хувийн зээлд хамрагдчихаад байгаа 76 мянган өрх, нийслэлийн төвийн зургаан дүүрэгт байр авсан иргэдийн зээл 5 хувь руу шилжих аж.

24tsag.mn