Ерөнхий сайд асан Н.Алтанхуягийн ахлах зөвлөхөөр ажиллаж байсан Л.Гансүх нар давж заалдах шатны шүүхийн шийдвэрийг эсэргүүцэж Улсын дээд шүүхэд хандсан.

Улсын дээд шүүхийн хурал энэ долоо хоногийн сүүлээр буюу пүрэв, баасан гаригийн аль нэгэнд нь болно гэсэн мэдээлэл байсан ч Улсын дээд шүүхээс шүүх хуралдааныг товлоогүй байна. Энэ талаар Улсын дээд шүүхээс тодруулахад "Энэ 7 хоногийн сүүлээр ирэх долоо хоногт болох шүүх хурлуудын тов гарна. Тэгэхээр эргэн холбогдон тодруулаарай. Л.Гансүхийн шүүх хурал энэ 7 хоногийн хуваарьт байхгүй" гэх мэдээллийг өглөө. 

Уг нь хэргийг хяналтын шатны шүүх 2016 оны нэгдүгээр сарын 26-ны өдөр хүлээн авсан. Эрүүгийн байцаан шийтгэх хуулийн 346.2-т "Шүүх хэргийг хүлээн авснаас хойш 30 хоногийн дотор хянан шийдвэрлэх ба хэргийн ээдрээ түвэгтэй байдлыг харгалзан энэ хугацааг Танхимын тэргүүн шүүгч 14 хүртэл хоногийн хугацаагаар сунгаж болно" гэсэн байдаг. Хэргийг хяналтын шатаар хэлэлцэх хугацаа хоёрдугаар сарын 25-нд дууссан. Тэгээд 14 хоногоор хугацааг сунгасан байдаг юм. Тэгэхээр сунгасан хугацаа энэ 7 хоногт дуусч, шүүх хурал болно гэсэн хүлээлт байсан ч товыг гаргаагүйн улмаас ийнхүү хойшиллоо.

Шүүх хурал ирэх 7 хоногт болох эсэх нь ч эргэлзээтэй байгаа юм.

Л.Гансүх нарыг "Нүүрс" хөтөлбөрийг хэрэгжүүлэхдээ их хэмжээний мөнгө завшиж улсад онц, их хэмжээний хохирол учруулсан хэмээн буруутгаж байгаа юм. Анхан шатны Баянзүрх, Сүхбаатар, Чингэлтэй дүүргийн шүүх уг хэргийг хэлэлцээд Л.Гансүхэд дөрвөн жил зургаан сар хорих ял оноож, улс төрийн алба хаах эрхийг дөрвөн жилээр хасч, Н. Даваахүүгийн мэргэжлийн ажил хийх эрхийг хоёр жилээр хасч, хөдөлмөрийн хөлсний доод хэмжээг 100 дахин нэмэгдүүлсэн буюу 19 сая 200 мянган төгрөгөөр торгох, Б.Мөнгөнтуяад мэргэжлийн ажил хийх эрхийг хоёр жилээр хасч, хөдөлмөрийн хөлсний доод хэмжээг 100 дахин нэмэгдүүлсэн буюу 19 сая 200 мянгөн төгрөгөөр торгох ял оногдуулсан. Анхан шатны шүүхээс ял шийтгүүлсэн дээрх гурван иргэнээс нийт 2 тэрбум 539 сая 730 мянга 860 төгрөгийг хувь тэнцүүлэн гаргуулж, “Багануур” ТӨХК-д олгох шийдвэрийг шүүх гаргасан. Татвараас зайлсхийсэн асуудлын тухайд Эдийн засгийн ил тод байдлын тухай хуульд хамруулан, өршөөсөн. Энэ шийдэврийг хүлээн зөвшөөрөөгүй тул шүүгдэгч нар давж заалдах шатны шүүхэд гомдол гаргасан ч анхан шатны шүүхийн шийдвэрт өөрчлөлт оруулалгүйгээр хэвээр үлдээхээр шийдвэрлэсэн байдаг. Тэд уг шийдвэрийг ч хүлээн зөвшөөрөлгүй Улсын дээд шүүхэд хандсан нь энэ аж.

Харин удахгүй болох шүүх хуралд Л.Гансүх өөрийн биеэр оролцох хүсэлтэй байгаа. Тиймээс уг хүсэлтээ өөрийн өмгөөлөгч Ц.Баасандоржоор дамжуулан Улсын дээд шүүхэд хүргүүлжээ. Мөн тэрбээр шүүх хурлын үйл явцыг телевизээр шууд дамжуулах хүсэлтэй байгаа гэнэ.

Хүн гэм буруугүй гэдгээ нотлох боломжийг хаасан заалт манай Эрүүгийн хуулинд байдаг. Гэхдээ энэ нь шүүх хуралдаа өөрийн биеэр нь оролцож болохгүй гэсэн үг биш. Тиймээс би хүсэлтийг нь Улсын дээд шүүхэд дамжуулаад өгчихсөн байгаа.

Энэ талаар Л.Гансүхийн өмгөөлөгч Ц.Баасандорж ярихдаа "Давж заалдах шатны шүүх хуралд Л.Гансүх гуайг өөрийг нь байлгалгүй алсын зайнаас онлайнаар холбогдоод шүүчихсэн. Хүн гэм буруугүй гэдгээ нотлох боломжийг хаасан заалт манай Эрүүгийн хуулинд байдаг. Гэхдээ энэ нь шүүх хуралдаа өөрийн биеэр нь оролцож болохгүй гэсэн үг биш. Тиймээс би хүсэлтийг нь Улсын дээд шүүхэд дамжуулаад өгчихсөн байгаа. Давж заалдах шатны шүүх хурал дээр нэг шүүгч тусгай санал гаргасан. Энэ саналыг шүүгдэгчийн өмгөөлөгчид одоог хүртэл танилцуулаагүй. Танилцах боломж өгөхгүй байна. Мөн Улсын дээд шүүхийн хурлын процессыг олны нүдэн дээр ил, тод шийдвэрлэх хэрэгтэй. Үнэ, жингийн зөрүүгээр хүнийг яллаж болдог эсэхэд жишиг тогтоох шүүх хурал болно. Гэхдээ анхнаасаа олны дунд байж, маш олон эргэлзээг төрүүлсэн энэ хэрэг ард түмний хяналтан дор шийдэгдэх ёстой. Шүүх ил, тод нээлттэй, үйл ажиллагаагаа ард түмнээсээ нуухыг хүсэхгүй байгаа юм бол шүүх хурлыг үзэх, ажилд нь дүн тавих эрхийг ард түмэнд олгох ёстой" гэжээ. 

Т.Хулан