Монгол Улсын Их Хурлын Тамгын газрын Ерөнхий нарийн бичгийн дарга, Ази, Европын парламентын түншлэлийн 9 дүгээр уулзалтыг зохион байгуулах ажлын бэлтгэл ханган ажиллах үүрэг бүхий Ажлын хэсгийн ахлагч Б.Болдбаатар өнөөдөр /2016.03.10/ сэтгүүлчдэд мэдээлэл хийв. 

 

 

АСЕМ-ын БАА-ны орлогч дарга Б.Баясгалан хэвлэлийн хурлын эхэнд, долоо хоногийн Пүрэв гараг бүр 11.00 цагт Ази, Европын Дээд түвшний XI уулзалт (АСЕМ)-ын талаар мэдээлэл хийж байхаар шийдвэрлэсэн талаар танилцуулаад анхны мэдээллийн цагт Монгол Улсын Их Хурлын Тамгын газрын Ерөнхий нарийн бичгийн дарга, Ази, Европын парламентын түншлэлийн 9 дүгээр уулзалтыг зохион байгуулах ажлын бэлтгэл ханган ажиллах үүрэг бүхий Ажлын хэсгийн ахлагч Б.Болдбаатар оролцож байна гэв.

 

 

 

Монгол Улсад зохион байгуулагдах АСЕМ-ын дээд түвшний XI уулзалтын хүрээнд Ази, Европын парламентын түншлэлийн IX уулзалтыг зохион байгуулахаар бэлтгэл ажлыг ханган ажиллаж байгаа талаар Монгол Улсын Их Хурлын Тамгын газрын Ерөнхий нарийн бичгийн дарга Б.Болдбаатар мэдээллийн эхэнд дуулгав.

 

 

 

 

Тэрээр “АСЕМ-ын дээд түвшний XI уулзалтын хүрээнд 10 гаруй арга хэмжээ зохион байгуулагдах бөгөөд үүний хамгийн эхний арга хэмжээ нь Ази, Европын парламентын түншлэлийн IX уулзалт юм. Энэ уулзалт тухайн орны парламент байрладаг ордонд зохион байгуулагддаг уламжлалтай. Энэ дагуу Төрийн ордонд 04 дүгээр сарын 21-23-ны өдрүүдэд зохион байгуулагдана” гэв. Энэ удаагийн АСЕМ-ын дээд түвшний уулзалт 20 дахь жилдээ зохион байгуулагдаж буйгаараа онцлогтой. Тиймээс энэ ойг тохиолдуулан парламентын түншлэл энэ уулзалтад ямар үүрэг гүйцэтгэдэг талаар ярилцахаар Ази, Европын парламентын түншлэлийн IX уулзалтыг “Ази, Европын парламентын түншлэлийн АСЕМ дахь үүрэг” сэдвийн хүрээнд зохион байгуулах юм байна. Түүнчлэн энэ үеэр улс төр, эдийн засаг болон нийгэм, соёлын чиглэлийн хоёр салбар хуралдаан болно. 

 

Ази, Европын парламентын түншлэлийн IX уулзалтад оролцох урилгыг АСЕМ-ын гишүүн 51 орны парламентын дээд, доод танхимуудын дарга нар, олон улсын 2 байгууллагад албан ёсоор хүргүүлжээ. Өнөөдрийн байдлаар 23 орны 100 гаруй төлөөлөгч тус уулзалтад оролцохоо албан ёсоор мэдэгдсэн байна. Түүний дотор 3 орны парламентын дарга, 6 орны парламентын дэд дарга оролцох юм байна.

 

Монгол Улсын Их Хурлаас www.asep9.parliament.mn цахим хуудас ажиллуулж байгаа бөгөөд Ази, Европын парламентын түншлэлийн IX уулзалтын талаарх ерөнхий мэдээлэл, хөтөлбөр болон уулзалтад оролцох төлөөлөгчдөд зориулсан зөвлөгөө мэдээллийг багтаасан байна. 

 

Ази, Европын парламентын түншлэлийн IX уулзалтад нийтдээ 250 орчим төлөөлөгч оролцоно хэмээн тооцож бэлтгэл хангаж байгаа бөгөөд МИАТ компанийн Берлин-Улаанбаатар чиглэлийн нислэгтэй хамтран ажиллаж байгаа аж. Мөн уулзалтын бэлтгэл ажлын хүрээнд Төрийн ордны Их танхим болон уулзалт болох танхимуудын засвар үйлчилгээ төлөвлөгөөт хугацааны дагуу үргэлжилж байгаа аж. Түүнчлэн олон улсын хуралдаан зохион байгуулах нөхцлийг хангах үүднээс хуралдаанууд болох танхимуудыг орчуулгын орчин үеийн техник хэрэгслээр тоноглоод байгаа талаар Монгол Улсын Их Хурлын Тамгын газрын Ерөнхий нарийн бичгийн дарга Б.Болдбаатар сэтгүүлчдэд мэдээллээ. 04 дүгээр сарын 21-23-ны өдрүүдэд хэвлэл мэдээллийн байгууллагуудын шуурхай ажиллах нөхцлийг бүрдүүлэхээр зохион байгуулж байгаагаа дуулгаад, нээлттэй болж буй хуралдаан, уулзалтуудыг олон нийтэд хүргэх талаар мэдээлсэн юм. 

“АСЕМ-ын Мэдээллийн төв”-д хийсэн хэвлэлийн хурлын төгсгөлд Монгол Улсын Их Хурлын Тамгын газрын Ерөнхий нарийн бичгийн дарга Б.Болдбаатар сэтгүүлчдийн сонирхсон асуултад дэлгэрэнгүй хариулт өглөө хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.