Нүүдэл эрчимжиж байна. Сонгуулийн хуульд УИХ өөрчлөлт оруулан баталсны дараагаас л гуравдагч хүчний намууд хэнтэй эвсэх, хамтрах, хэний хаяа бараадах тухайгаа бодож эхэлсэн. Гуравдагч хүчний намууд болон бие даагчдын боломжийг хумьж, АН, МАН-ынхан өөрсдөдөө тааруулсан хууль гаргасан гэж буй. Гэвч хэт олон болсон, цаасан дээр голдуу мөртэй намуудыг нэгтгэх, цэгцлэх давуу талыг уг хууль бас олгосон юм. Юутай ч хүссэн, хүсээгүй нэгдэх, эвсэх үйл явц намуудын дунд өрнөж байна. Зарим улстөрч ч хувийн сонголтоо хийж, “нүүхэд” бэлдэж эхэлжээ. Улстөрчдийн нүүдлийн салхийг С.Ганбаатар хагалж, Хөдөлмөрийн үндэсний нам (ХҮН)-д данстай болсон. Бүр хэдхэн хоноод л дарга нь болчихсон. Уг намын ард анхнаасаа л тэр байсан гэх яриаг баталгаажуулах мэт УИХ-ын сонгуулийг давуулж, Ерөнхийлөгчийн сэнтий рүү зүтгэхээ мэдэгдээд буй. Түүний араас Г.Уянга, Х.Болорчулуун нар намд элсэнэ, солино гэх мэдээлэл гарах болов. БНН-ын дарга Б.Жаргалсайхан ч юу дутах вэ, намаа орхиод МАН-д элсэх сурагтай.
Г.Уянгын сонголт ИЗНН уу
МҮАН-ыг төлөөлж, Чингэлтэй дүүргээс УИХ-д сонгогдсон энэ бүсгүй өнгөрсөн дөрвөн жилд намынхнаасаа нэлээд зөрж ажилласан. Засгийн газрыг хамтран байгуулж, олонх болсон атлаа “эсэргүү” дүр бүтээсэн. Тиймээс ч нэлээд дээрээс нь нэр бүхий хэсэг гишүүний хамт өөр нам байгуулах гэнэ гэсэн яриа гарсан юм. Ерөнхий сайд Ч.Сайханбилэгийг огцруулах тогтоолын төсөл санаачилж, гарын үсэг цуглуулсаар хэлэлцүүлж дөнгөсөн. Тухайн үед түүнтэй хамтарсан МАХН-ын Л.Цог, О.Баасанхүү нарт намын дарга нь “Нэрээ татахгүй бол ирэх сонгуульд нэр дэвшүүлэхгүй” гэсэн сануулга өгч байсан билээ. Үүнээс ч болсон уу, “Г.Уянга “Шударга ёс” эвслийн бүлгээс гарна” гэх яриа түгсэн. Хууль тогтоох эрхтэй болсон, нам нь Засгийн эрх барьсан дөрвөн жилд тэр “гадаа” байхдаа шүүмжлээд байсан бүхнээ гүйцэлдүүлэхийн төлөө ажиллаагүй. Харин ч шүүмжлэхийн тулд шүүмжлэх зорилготой мэт харагдаж ирсэн. Анхнаасаа л тэр “өөр хүн” байжээ. Тиймээс Сонгуулийн хууль баталсны дараанаас улс төрийн өөр шийдэл гаргана гэдгээ сэтгүүлчдэд мэдэгдсэн юм. Хамтрагч С.Ганбаатар нь ХҮН-д орсны дараа түүнийг ч бас тийш зүглэнэ гэсэн мэдээлэл гарсан. Гэвч гишүүн үүнийг үгүйсгэж, “Оюутолгой, Тавантолгой, Гацуурт гээд олон асуудлаар ХҮН байр сууриа илэрхийлдэггүй, чив чимээгүй байдаг. Тийм учраас би их гайхдаг” хэмээн ярьсан байв.
Тэгвэл сүүлийн үед түүнийг ИЗНН-д элсэх гэнэ гэж хэвлэлээр бичиж буй. Гэвч ИЗНН-ын талаас ийм яриа болсон, санал тавьсан зүйл байгаа эсэхийг лавлахад үгүйсгэв. Эрхэм гишүүний дотроо бодсон олон хувилбарын нэг нь л ИЗНН бололтой юм.
Б.Жаргалсайхан Л.Гүндалайн түүхийг давтах уу
БНН-ын дарга Б.Жаргалсайхан МАН-д элсэх сураг бас гарав. “Хас”-ын хэмээх тодотголгой Ч.Ганхуяг “Б.Жаргалсайхан ах Сүхбаатар дүүргийн Ардын намын хороонд бүртгэлтэй болж магадгүй болоод явчихлаа” хэмээн жиргэснээс энэ бүхэн эхтэй. БНН тэр чигтээ МАН-д нэгдэх үү, эсвэл дарга нь ганцаараа очиж элсэх үү гэдэг нь одоогоор тодорхойгүй. Хэрэв тэр хоёр дахь сонголтыг хийвэл Ард түмний намаа хаяж, АН-ын хаяа бараадсан Л.Гүндалайн түүхийг давтах юм. Угаас БНН-д Б.Жаргалсайханаас өөр олны танил болсон улстөрч байхгүй. Ганц хүний нам гэсэн тодотголтой хэдий ч ард нь Хэрэг эрхлэх газар, түүнийг дэмжиж элссэн цөөн боловч гишүүн бий л байх. Дахин нэг удаа албан тушаалын “бялуу” үмхэж байвал нам зэрэг ч сонин биш байж мэдэх юм.
Өнгөрсөн хугацаанд Б.Жаргалсайхан нийслэлийн Сонгинохайрхан дүүрэгт л нэр дэвшдэг байсан юм. ИЗНН-тай эвсэж, бас салж үзсэн. Энэ удаа огт өөр сонголт хийж, МАН-ыг сонгоод зогсохгүй, өрсөлдөх тойргоо сольж, Сүхбаатар болгож магадгүй гэнэ. Сүхбаатарын МАН-ын хороонд бүртгэлтэй болсон гэж буй нь ийм ойлголт төрүүлж буй юм.
