Олон нийтийн сүлжээгээр шүүмжлэл дагуулаад байсан “Сүнс өрөөнд байх үеийн цагийг олох бодлого” Олон улсын хэмжээний Кенгуру олимпиадын бодлого бөгөөд ЕБС-ийн сурах бичигтэй хамаагүй талаар ОУ-ын Кенгуру уралдааны Монгол дахь төлөөлөгч мэдэгдлээ. 

Олон улсын Кенгуру уралдаанд манай улс 2009 оноос оролцож эхэлсэн бөгөөд тэмцээний бодлогыг 40 гаруй гишүүнтэй олон улсын баг боловсруулдаг талаар мэдээлсэн. Тус бодлого Кенгуру уралдааны дасгал ажлын номонд орсон бөгөөд уралдаан зохион байгуулагддаг олон оронд орчуулагдан хэвлэгджээ.

Харин Боловсролын хүрээлэнгийн эрдэм шинжилгээний ажилтан А.Энхтогтох “ЕБС-ийн Математик, байгалийн ухааны боловсролын сургалтын хөтөлбөр, сурах бичгийг боловсруулах ажлыг БСШУЯ-ны сайдын тушаалаар баталгаажуулсан баг боловсруулсан. БСШУЯ-ны гаргасан математикийн болон байгалийн ухааны сурах бичигт шашин, сүнс, улс төрийн өнгө аястай агуулга огт байхгүй. Байгаа мэтээр олон нийтэд буруу ташаа ойлголт өгч байна. Хувь хүний хэвлэн борлуулсан номыг бидний зохион сурах бичиг мэтээр ярьж, бичиж байгаад харамсаж байна” гэв.

Математикийн цөм хөтөлбөрийг боловсруулах багийн гишүүн МУИС-ийн багш О.Итгэл "Энэ бодлогыг олон улсын комисс зохиосон. Үүнийг Монголоос өөр олон улс орон “сүнс” гэдэг утгаар нь орчуулсан байна лээ. Энэ бол зөвхөн тус уралдааны л материал. Сурах бичигтэй ямар ч холбоогүй асуудал юм.

Одоогийн байдлаар 64 орны зургаан сая хүүхэд энэ уралдаан оролцдог. Энэ сүнстэй холбоотой хүүхэд айх зэрэг ямар нэгэн асуудал гараагүй гэдгийг олон улсын уралдаан зохион байгуулах холбооны захирал надад хэлсэн. Дэлхийн хэмжээнд хүүхдүүд айгаагүй байхад Монгол хүн айж байгаа юм болов уу гэж хошигнон ярьж байна лээ” гэлээ.