МАХН-ын дарга Н.Энхбаярыг намынхаа нөхдөөс мөнгө нэхдэг тухай мэдээллүүд сүүлийн үед олны дунд дуулиан тарьж буй. Тухайлбал, ЭМС-ын сайд асан Г.Шийлэгдамба Н.Энхбаярын шахалт, дарамтанд орж бусдаас мөнгө авдаг байсан. Ингэж явахдаа хуулийн байгууллагад баригдсан гэж буй. Түүнчлэн тэрбээр авсан мөнгөө Н.Энхбаярт өгсөн гэж мэдээлсэн билээ. Харин Н.Энхбаяр "Би Г.Шийлэгдамбаас мөнгө аваагүй" гэж байгаа. Түүнээс гадна Худалдан авах ажиллагааны газрын дарга асан Д.Сандуйжав гэх хүн Н.Энхбаярт 500 сая төгрөг өгчихөөд буцааж авч чадахгүй байгаагаа хэлсэн.

Хамгийн сүүлд л гэхэд УИХ-ын гишүүн Л.Цог “Н.Энхбаяр дарга надаас 1 сая ам доллар нэхэж байсан” хэмээн ярьсан билээ.

Энэ мэт мөнгөтэй холбоотой асуудал Н.Энхбаярыг тойрсоор. Тэгвэл  МАХН-ын дарга Н.Энхбаяр бусдаас мөнгө нэхэх ажиллагаагаа зогсоох нь битгий хэл улам идэвхжүүлж эхэлсэн гэнэ. Тодруулбал, тэрбээр сүүлийн үед  намынхаа харъяат, улс төрд хүч үзэхээр бэлтгэж буй бизнесмэнүүдийг өрөөндөө дуудаж мөнгө нэхэж байгаа талаар зарим хэвлэлд бичжээ.

Түүний ингэж буй шалтгаан нь 2016 оны УИХ-ын сонгууль болон 2017 оны Ерөнхийлөгчийн сонгуульд нэр дэвших гэж буйтай нь холбоотой юм байна. Учир нь тэрбээр эдгээр сонгуульд хүч үзэхээр бэлтгэж байгаа бөгөөд сонгуулийн сурталчилгааны үеэр хэрэглэх мөнгөө бусдаас цуглуулж эхэлсэн нь энэ аж.

Т.Энхэлээ