МАХН-ын нарийн бичгийн дарга Ж.Сүхбаатар, Б.Тулга,  Ёс зүйн зөвлөлийн хорооны дарга Г.Давааням нар цаг үеийн асуудлаар мэдээлэл хийлээ.

Тэд бүлгээсээ гарахаа мэдэгдээд буй өөрийн намын гишүүн Л.Цог болон Булган аймгийн Мянгатын дарга асан С.Дашдондог нарт дүрмийн дагуу хариуцлага тооцно гэдгээ энэ үеэр мэдэгдлээ.

МАХН-ын нарийн бичгийн дарга Ж.Сүхбаатар хэлэхдээ “МАХН-ын дарга Н.Энхбаяр руучиглэсэн улс төрийн захиалгат, зохиомол, увайгүй, гүжирдлэг, хууль бус ажиллагааг сүүлийн саруудад тасралтгүй  явж буй учир МАХН-ын Гүйцэтгэх товчооноос намын гишүүд, дэмжигчид, олон нийтэд хандаж мэдэгдэл гаргаж байна. Бид уг гүжирдлэгэтэй цаашид тууштай тэмцэх болно. Ийм мэдээлэлд автахгүй байхыг иргэддээ анхааруулж байна.  Нэгдүгээр сарын 29-нөөс хойш МАХН-ын санхүүгийн өрөөг лацадсан учир өнөөдрийг хүртэл нээхгүй байгаа нь биднийг санхүүгийн аудит хийлгэх боломжгүй болгож байна, бидний дотоод асуудалд хэтэрхий оролцож байна ” гэлээ.

Мөн тус намаас гурван ажлын хэсэг гарч ажиллаж байгаа аж. Тухайлбал, Монголын ногоон намтай хамтран ажиллах ажлын хэсэг, АН, МАХН-ын хамтын ажиллагааны гэрээг дүгнэх ажлын хэсэг гарч ажиллаж байгаа гэв. Мөн Хөгжлийн хувьсгал хөтөлбөрийг боловсруулж УИХ-д өргөн барихаар ажиллаж байгаа аж. МАХН-ын Ёс зүйн хороо хуралдаж Ерөнхий нарийн бичгийн дарга Ш.Шийлэгдамбын асуудлыг хэлэлцсэн байна. Түүнийг үүрэгт ажлаас нь чөлөөлөх асуудлыг намын бага хурлаараа хэлэлцэхээр болжээ. 

Т.Энхэлээ