Улс төр унтаа цагаар УИХ-ын гишүүн Л.Цог, Г.Уянга нар бүлгээсээ гарах болсноо мэдэгдсэн нь жинхэнэ дуулиан болов. Хамгийн ноцтой нь эвслийн бүлэг задрах хэмжээний эмзэг байдалд хүрлээ. Одоо тус бүлгээс ганц гишүүн л гарах тохиолдолд  албан ёсоор задарна. Тус бүлэг УИХ-ын сонгуульд 11 суудал авсан ч УИХ-ын гишүүн, Нийгмийн бодлого боловсрол, соёл, шинжлэх ухааны байнгын хорооны дарга Д.Батцогт Ардчилсан намын гишүүнчлэлтэй болсноор  эвслийн бүлэг 10 гишүүнтэй болсон. Сая Л.Цог болон Г.Уянга нарын гишүүд гарчихлаа. Одоо дахин нэг гишүүн гарвал тус бүлэг эрх зүйн чадамжгүй болж буй юм. Хуульд зааснаар УИХ дахь намын бүлэг нь наймаас дээш гишүүнтэй байж, эрх зүйн чадамжтай болдог. Тэгэхээр одоо ганц хүүгийн нүүдлээс тус бүлгийн хувь заяа шалтгаална гэсэн үг. 

Тодруулбал, О.Баасанхүүгийн шийдвэр МАХН-МҮАН-ын Шударга ёс эвслийн бүлгийн оршин тогтнох эсэхийг шийдэхээр болж байна. Үүнийг мэдсэн "Шударга ёс" эвслийн бүлгийн удирдлагууд О.Баасанхүүг тогтоохын тулд УИХ-ын дэд даргын албан тушаалыг хүртэл амалж буй сурагтай. Тус бүлэг дотооддоо албан бусаар хуралдаж Л.Цогийг УИХ-ын дэд даргаас нь чөлөөлж, оронд О.Баасанхүүг томилох эсэхийг ярилцаж байгаа аж.

Хэдхэн сарын настай билэгдлийн албан тушаалаар О.Баасанхүүг аргалж байна гэсэн үг.

Харин О.Баасанхүүгийн хувьд бүлгээсээ татгалзвал УИХ-ын гишүүнээсээ автоматаар чөлөөлөгдөх юм. Учир нь тэрбээр намын жагсаалтаар УИХ-д суусан. Тиймээс тэр бүлгээс гарах сонголтыг тийм амар хийхгүй биз. Г.Уянга, Л.Цог нарын хувьд Ерөнхий сайд Ч.Сайханбилэгийг огцруулах асуудлаас эхлэн бүлгээсээ гарна гэдгээ мэдэгдэж эхэлсэн. Тэд хоёулаа намын удирдлагууд тэр дундаа Н.Энхбаяртай таарахаа больсон гэдгээ уг үйлдлээрээ харууллаа.  УИХ-ын гишүүн Л.Цог саяхан хэвлэлд өгсөн ярилцлагадаа “Н.Энхбаяр дарга надаас 1 сая ам.доллар нэхсэн, шантаажилсан. Үнэнийг нь хэлэхэд Н.Энхбаяр битгий амь тэмц. Би дахиад ярих болно” гэх мэтээр ярьсан нь ч үүнтэй холбоотой байж.

Өчигдөр "Шударга ёс" эвслийг бүрдүүлдэг хоёр намын удирдлага болох Н.Энхбаяр болон М.Энхсайхан нар мэдэгдэл гаргаж, "Г.Уянга, Л.Цог нар гарсан нь бүлгийн үйл ажиллагаанд огтхон ч нөлөөлөхгүй" гэсэн билээ.

Цаг үеийн асуудлаар Г.Уянга гишүүнээс дараах тодруулгыг авлаа.

- УИХ-ын гишүүн Л.Цог та хоёр бүлгээсээ гарна гэдгээ мэдэгдлээ. Ямар шалтгаанаар бүлгээсээ гарахаар шийдсэн юм бэ?

- Би өнгөрсөн хугацаанд “Шударга ёс” эвслийн бүлэгт шүүмжлэлтэй хандаж ирсэн. “Шударга ёс” эвлийн бүлэг “Монголоо аврах таван хувьсгал” гэх хөтөлбөрийг боловсруулж сонгогчдын саналыг авсан. Энэ хөтөлбөрийнхөө төлөө маш хангалтгүй ажиллаж ирсэн. Хамтарч засаг барьсан. Гэхдээ хөтөлбөрөө хэрэгжүүлэхийн төлөө ажиллаагүй. Хэн сайд болох вэ гэдэг асуудлыг үүнээс илүү чухалаар хөндөж байсан байх. Л.Цог дарга бид хоёрын шүүмжлэлтэй хандаж ирсэн нэг зүйл бий. Бид хоёрын хувьд “Монголоо аврах таван хувьсгал” хөтөлбөрт орсон өөрчлөлтийн үзэл санаандаа үнэнч үлдсэн.

- Бүлгийн удирдлагууд болон гишүүдтэйгээ санал, бодлоо ярилцаад асуудлыг шийдэж болсонгүй юу?

- Тийм оролдлогыг өнгөрсөн дөрвөн жилийн турш хийсэн. Жишээлбэл, Оюутолгойг аварч үлдэх, баялагийг Монголын ард түмэнд тэгш, шударгаар хүртээмжтэй ашиглах гэх амлалтын төлөө “Шударга ёс” эвслийн бүлэг хуруугаа ч хөдөлгөсөнгүй. Олон асуудлууд бий. Тавантолгойн асуудалд ч зөв, зүйтэй байр, суурьтай байж чадсангүй. Энэ мэтчилэн Монголыг өөрчлөх оролдлогыг огтхон ч хийсэнгүй. Үнэхээр сэтгэл хангалуун бус байгаа. Гэхдээ шалтгаан нь дөрвөн жилийн хугацаанд тодорхой байсан. Хүмүүс түүнийг мэдэж байгаа. Одоо л үйлдэл хийж байна.

- Бүлгээсээ гарах хүсэлт гаргасан даруйд гаргачих уу. Эсвэл бүлгийн хурлаар авч хэлэлцэх үү?

- Хуулинд нарийн тодорхой заасан зүйлгүй. УИХ-ын гишүүн аль нэгэн бүлэг, эвсэлд хамаарах бүрэн эрхтэй байгаа. Бидний хүсэлтийг бүлгийн дарга нь УИХ-д УИХ-ын дарга нь УИХ-д танилцуулдаг.

- Бүлгээс гарч буй нь намаасаа татгалзаж байна гэж ойлгож болох уу?

- Одоохондоо намдаа байна. Ямар нэгэн алхам хийх нь тодорхойгүй байна.

Т.Хулан