УИХ-ын гишүүн О.Баасанхүү өнөөдөр мэдээлэл хийлээ.  Тэрээр мэдээллийн эхэнд хэлэхдээ,  “Монгол Улсын Ерөнхий сайдыг мэтгэлцээнд дуудсан. Мэтгэлцээн өнөөдөр 19 цагаас ТV-5 телевизээр цацагдах байсан юм. Гэвч Ерөнхий сайд Ч.Сайханбилэг ямар ч хариу өгөхгүй байна. Тиймээс мэтгэлцээнийхээ хугацааг дахин 1 сараар сунгаж 4 дүгээр сарын 23-нд мэтгэлцэх болно” гэлээ.

Мөн  32 хуулийн төсөл санаачлан Засгийн газраас санал авахаар хүргүүлсэн ч бүх хуулийн төслийг хэлэлцэх боломжгүй гэсэн хариу өгч байна. Тиймээс ямар шалтгаанаар хуулийн төслүүдийг хэлэлцэхгүй гэж байгаагаа тайлбарлах хэрэгтэй гэв.

Түүнчлэн УИХ дахь МАХН-МҮАН-ын  “Шударга ёс” эвслийн бүлэгт үүсээд байгаа нөхцөл байдлын талаар мэдээлэл өгсөн юм. Тэрбээр энэ талаар "Г.Уянга, Л.Цог нар эвслээс гарсныг хүндэтгэж байгаагаа мэдэгдэж, одоогоор өөрөө бүлгээсээ гарах эсэхээ шийдээгүй байгаа. Хэрэв би "Шударга ёс" эвслийн бүлгээс гарвал Засгийн газар шууд огцорно. Өөрөөр хэлбэл, миний бүлгээсээ гарах шийдвэр нь эвслийн бүлгийг задлаад зогсохгүй Засгийн газрыг огцруулах хэмжээнд очих эрсдэл байгаа учраас би бодож байна. Мөн О.Баасанхүү гишүүнийг УИХ-ын дэд дарга болгоно гэдэг "бор шувуу" нисч байна. Намайг болгоно гэдэг саналыг намаас хэн ч гаргаагүй, би болъё гэдэг санал ч тавиагүй. УИХ-ын дэд дарга болох ч үгүй" гэв.

Т.Энхэлээ