Авлигатай тэмцэх газраас цаг үеийн асуудлаар мэдээлэл хийлээ. Тус газрын ажилтнууд өчигдөр Төрийн ордонд Шадар сайдын өрөөнд нэвтэрч, МАХН-ын дарга Н.Энхбаярт шаардлага өгсөн билээ. Үүнтэй холбоотойгоор АТГ-ын ажилтнууд хууль зөрчиж, ямар ч зөвшөөрөлгүй Шадар сайдын өрөөнд дайрч орсон гэх мэдээлэл гараад байсан ч АТГ-аас үүнийг эрс үгүйсгэлээ. Учир нь АТГ-ын байцаагчид хуулийн дагуу Төрийн ордонд орох эрхтэй байдаг аж.

АТГ-аас Монгол Улсын иргэн Н.Энхбаярыг Эрүүгийн хуулийн 133.1, 148.4-д заасан хэрэгт сэжигтнээр тооцон шалгах үндэслэлтэй байгаа аж. Тодруулбал, Эрүүгийн хуулийн 133.1 нь Г.Шийлэгдамбын захидалд дурдсан 500 сая төгрөгт холбогдох хэрэг аж. Харин 148.4 нь МАХН-ын гишүүн, УИХ-ын дэд дарга Л.Цогийн мэдээлсэн намын байрны хөрөнгийн эх үүсвэр болон, түүнээс нэг сая ам.доллар нэхсэн гэх залилангийн асуудал аж.

Мөн АТГ-аас МАХН-ын дарга Н.Энхбаярт бусдын батлан даалтад өгөх, таслан сэргийлэх арга хэмжээ авчээ. Учир нь, Батлан хамгаалахын сайд Ц.Цолмон, Барилга хот байгуулалтын сайд З.Баянсэлэнгэ нар иргэн Н.Энхбаярыг дуудсан цагт хариуцан ирүүлж байх үүргийг бичгээр авсан байна.

Т.Энхэлээ