Өнөөдөр зарлагдсан УИХ-ын ээлжит бус чуулганаар хэлэлцэх байсан цөмийн асуудалтай холбоотой хуулийн төслүүдийг Засгийн газар эргүүлэн татахаар болсон байна. Тодруулбал, Засгийн газар уг хуулийн төслөө буцаан татаж, тусад нь бие даасан хууль болгож дахин өргөн барихаар болжээ.

Уг асуудлыг УИХ дахь АН-ын бүлэг өнөөдрийн хуралдаанаараа хэлэлцсэн байна. Энэ талаар АН-ын бүлгийн дарга Б.Гарамгайбаатар “МАН-ын гишүүн Ж.Энхбаярыг Аюулгүй байдал, гадаад бодлогын байнгын хорооны дарга байхад уг тогтоолын төсөл батлагдаж байсан юм байна. Эдгээр конвенциудад Монгол улс нэгдэх нь зүйтэй. Энэ ажиллагааг Засгийн газар яаралтай шийдвэрлэх хэрэгтэй гэдэг тогтоолыг гаргаж байсан гэсэн үг. Энэ дагуу Засгийн газар уг асуудлыг УИХ-д оруулж ирсэн. Уг асуудлыг өнөөдөр хэлэлцсэн бол Монгол улсад ашигтай байх байсан талаар манай бүлгийн гишүүд ярилцлаа. Ингэх юм бол хуулийн дагуу зөв зүйтэй болно. Хэрэв энэ асуудлыг хэлэлцэхэд Ардын намын гишүүд орж ирэхгүй бол цацраг идэвхит бодисыг Монголд булшлахыг дэмжиж байна гэсэн байр суурь харагдана гэж бид үзэж байгаа” гэлээ.

Тэрбээр мөн "Уг асуудлыг МАН болон бусад улс төрийн хүчнүүд  улс төржүүллээ" гэв. Тиймээс АН-ын бүлгээс энэ асуудлын дагуу хууль боловсруулж оруулж ир гэдэг чиглэлийг Засгийн газарт өгчээ. Тодруулбал, Засгийн газраас "Аливаа улс орны ашигласан түлш болон цацраг идэвхит хаягдлыг өөрийн нутаг дэвсгэрт импортоор оруулахыг хориглох тухай хуулийн төсөл"-ийг боловсруулж УИХ-д өргөн барьж батлуулахаар шийдвэрлэсэн байна.

УИХ дахь Ардчилсан намын бүлгийн дэд дарга С.Одонтуяа “Монгол Улс цөмийн зэвсэгтэй хоёр орны дунд байгаа. Конвенцид нэгдсэнээр Монгол Улс энэ чиглэлийн бүх мэдээллийг авдаг болно, боловсон хүчнээ бэлтгэдэг болно, аюулгүй байдлаа хангах боломж нэмэгдэнэ. Сонгууль дөхөөд бүх зүйлийг улстөржсөн өнцгөөс хараад байх шиг байна. УИХ-аас тогтоол гараад Засгийн газарт үүрэг болгосны дагуу эдгээр конвенцид нэгдэн орох хуулийн төслөө өргөн барьсан. Зөвхөн соёрхон батлах асуудлууд байгаа. Зарим бүлэг ээлжит бус чуулганыг ашиглаад цөмийн хагядал түлшийг импортлох гэж байна гэсэн  ташаа мэдээлэл хийж байна, зөв ойлгуулах шаардлагатай. Бүлгээс Ерөнхийлөгчийн зарлиг байгааг хуульчилж, Монгол Улсын нутаг дэвсгэрт импортоор цөмийн хаягдал болон түлшийг оруулж ирэхгүй байхыг баталгаажуулъя гэдэг дүгнэлт гаргалаа. Ингэхгүй бол одоо улсын байцаагч зөвшөөрөхгүй бол импортолж болохгүй, улсын байцаагч зөвшөөрөх юм бол импортолж болох юм шиг  заалт байгаа учраас хууль болгоод илүү хамгаалалт хийж, холбогдох олон улсын гэрээ конвенцид нэгдэн оръё гэсэн” тайлбар хийсэн юм. Үүний дараа сэтгүүлчдийн асуултад дараах хариулт өгөв.

Засгийн газрын хувьд өнөөдөртөө багтаан энэхүү хуулийн төслийг УИХ-д өргөн мэдүүлэх юм байна. Хуулийн төслийг Засгийн газар УИХ-д өргөн мэдүүлсэний дараа ээлжит бус чуулганыг нээж, хуулиудыг хэлэлцэх юм.

Т.Энхэлээ