УИХ-ын ээлжит бус чуулганыг өнөөдөр үдээс өмнөдөө нээхийг чармайсан ч ирц бүрдээгүй учраас хойшилж, 14.00 цагт дахин зарлагдсан. Гэтэл 14.00 цагт товлогдсон чуулганы хуралдаан дахин хуралдаж чадалгүй хойшиллоо. Ээлжит бус чуулганыг нээчихвэл УИХ-ын Аюулгүй байдал, гадаад бодлогын байнгын хороо хуралдаж, Засгийн газрын өргөн мэдүүлсэн Ашигласан түлш, цөмийн болон цацраг идэвхт хаягдлыг Монгол Улсын хилээр оруулахыг хориглох тухай хуулийн төсөл, мөн холбогдох конвенциудыг хэлэлцэх юм.

УИХ-ын дарга З.Энхболд энэ талаар "Чуулганы хуралдаанаар Засгийн газраас яаралтай хэлэлцүүлэхээр өргөн барьсан цөмийн болон цацраг идэвхт хаягдлыг Монгол улсын хилээр оруулахыг хориглох асуудлыг хэлэлцэнэ. Ийм чухал асуудлыг хэлэлцэх гэж байхад МАН-ынхан хуралдаа суухгүй байна. Тэгэхээр МАН-ынхан цөмийн хог хаягдлыг газар нутагтаа булахгүй, хадгалахгүй байх асуудлыг эсэргүүцээд байх шиг байна. МАН-ын гишүүдийг маргааш өглөө 09.00 цагт хуралдаа орж ирэхийг хүсье. Өчигдрөөс хойш хүлээсэн. Одоо хуралдаа сууцгаа. Мөн МАН-ын бүлгийн гадаадад томилолттой яваа гишүүд албан ёсоор чөлөө аваагүй байна" гэлээ.

Ингэснээр ээлжит бус чуулганы нээлт маргааш 09.00 цагт эхлэхээр товлогдлоо.

Т.Энхэлээ