-Дулаанхаан тосгоны дөрвөн замын уулзвараас Ерөө, Хүдэр сумдыг холбосон хатуу хучилттай автозамын ажил концессын гэрээгээр хэрэгжиж байна-

УИХ-ын гишүүн, Аж үйлдвэрийн сайд Дондогдоржийн Эрдэнэбат Сэлэнгэ аймагт ажиллаж байна. Тэрбээр тус аймагт үйл ажиллагаагаа явуулж буй ЖДҮ эрхлэгчдийн үйл ажиллагаатай танилцаж, аж үйлдвэрийн бодлого болон ЖДҮ үйлдвэрийг дэмжих сангийн зээл, Сум хөгжүүлэх сангийн зээлийн журмын өөрчлөлтүүдийн талаар үйлдвэр эрхлэгчдэд танилцуулж, санал бодлоо хуваалцлаа.  Мөн  Аж үйлдвэрийн сайдын  чиг үүрэгт багтдаг төр хувийн хэвшлийн түншлэл буюу концессын гэрээгээр хэрэгжүүлж буй  замуудын ажилтай танилцсан юм.

Ерөө, Хүдэр сумдыг хатуу хучилттай авто замаар холбоно

Тэрбээр “Дарханы төмөрлөгийн үйлдвэр” ХК, “Пик девелопмент” ХХК, “Кью Эс Си” ХХК-иуд хамтран хэрэгжүүлж буй автозамын төслийн  ажлын явцтай танилцсан юм. Сэлэнгэ аймгийн Шаамар сумын Дулаанхаан тосгоны дөрвөн замын уулзвараас Ерөө, Хүдэр сумыг холбосон 104.5 км авто замыг ирэх арваннэгдүгээр сард ашиглалтад оруулахаар төлөвлөжээ. Автозамын ажил концессын гэрээгээр хэрэгжиж буй “Уул уурхай металлургийн цогцолбор” байгуулах төслийн хүрээнд хийгдэж байгаагаараа онцлог. Одоогоор авто зам барих ажлыг эхлүүлж, замын далан барих ажлуудыг хийж, гүйцэтгээд байна. 

Аж үйлдвэрийн сайд Д.Эрдэнэбат энэхүү концессоор хэрэгжиж буй  автозамын ажлын явцтай танилцсаны дараа улсын төсвийн хөрөнгө оруулалтаар тус суманд баригдаж буй гүүрийн ажилтай танилцлаа. Гүүрийн ажлыг “Ган гүүр” компани гүйцэтгэж байгаа бөгөөд ирэх есдүгээр сард ашиглалтад оруулахаар төлөвлөн ажиллаж байгаа гэв. Нийт дөрвөн  тэрбум төгрөгийн өртгөөр баригдаж буй тус гүүрийн ажлыг хэвийн үргэлжлүүлэхэд үлдэгдэл санхүүжилтийн асуудал тулгамдаад байгаа аж.

Монголчууд савх үйлдвэрлэж, Япон руу экспортолж байна

Үүний дараа Аж үйлдвэрийн сайд Д.Эрдэнэбат Ерөө  сумын нутагт үйл ажиллагаа эрхэлж буй вакум цонх, хаалганы “Ерөө вакум” үйлдвэрийн үйл ажиллагаатай танилцав. 2001 онд  Жижиг, дунд үйлдвэрийг хөгжүүлэх сангаас долоон сая төгрөгийн зээл авсан тус үйлдвэр орон нутгийн хэрэгцээг бүрэн хангаад зогсохгүй Хүдэр зэрэг зэргэлдээх сумдын захиалгыг хийж, гүйцэтгэдэг байна. Улирлаас хамаарч захиалга харилцан адилгүй байдаг ч өдөрт дунджаар 10-20 цонхны захиалга тогтмол ирдэг гэв. Ерөө сумынхны хувьд орон нутгийн үйлдвэрлэлээ дэмжиж тус үйлдвэрээр  вакум цонх, хаалгаа хийлгэдэг байна. Учир нь Дархан, Улаанбаатар зэрэг төв суурин газраас вакум цонх, хаалга худалдаж авахаар тээвэрлэлтийн зардал өндөр тусдаг төдийгүй эвдрэл, гэмтэл учирсан тохиолдолд хол явах шаардлага тулгардаг байна. Тус компани үйлдвэрлэлээ нэмэгдүүлэхээр өргөтгөл барьж байгаа бөгөөд удахгүй ашиглалтад оруулна гэв. Энэ үеэр Аж үйлдвэрийн сайд Д.Эрдэнэбат Сум хөгжүүлэх сангийн зээлийн журамд өөрчлөлт оруулсныг дуулгаад үйлдвэрлэгч банктай харилцаж цаашид асуудлаа шийдвэрлэх шударга зохицуулалт хийснийг хэллээ.

Аж үйлдвэрийн сайд Д.Эрдэнэбатын дараагийн танилцсан үйлдвэр Ерөө сумын Бугант тосгон,  Хүдэр суманд орших “Савхны үйлдвэр”-үүд  байлаа.  Ерөө сумын Бугант тосгонд орших савхны үйлдвэр орон нутгийнхныгаа тогтмол ажлын байраар хангаж, жилд 400 сая ширхэг савх үйлдвэрлэдэг байна. Бүтээгдэхүүнээ 100 хувь экспортод гаргадаг бөгөөд цаашид технологио шинэчилж, сайжруулах зайлшгүй шаардлага тулгараад байна гэлээ.  Харин Хүдэр суман дахь “Тарс”  савхны үйлдвэрийнхэн орон нутагтаа  80 гаруй иргэнийг тогтмол ажлын байраар хангадаг бөгөөд бүтээгдэхүүнээ мөн л  экспортод гаргадаг юм байна. Үүнээс гадна  газар тариалан болон гурилын үйлдвэрийн үйл ажиллагаа эрхэлдэг “Хаан шоргоолж” үйлдвэрийнхэн өнгөрсөн онд Жижиг дунд үйлдвэрийг хөгжүүлэх сангаас 600  сая төгрөгний зээл авсан юм байна. Одоогоор бүтээн байгуулалтынхаа ажлын 50 хувийг хийсэн байна. Цаашид үйлдвэрлэлийн процесс руу бүрэн шилжих бэлтгэл ажлаа хангаж байгаа гэдгээ салбарын сайддаа  хэлж байлаа.