УИХ дахь МАН-ын бүлэг хуралдаж, хуралдаанаар хэлэлцсэн асуудлуудын талаар тус бүлгийн дарга С.Бямбацогт, дэд дарга Д.Хаянхярваа, Н.Номтойбаяр нар мэдээлэл өглөө.

Тус бүлэг Ерөнхийлөгчөөс өргөн мэдүүлсэн Засгийн газрын тухай хуульд нэмэлт, өөрчлөлт оруулах тухай хуулийн төсөл буюу давхар дээлийг халах хуулийг дэмжихээр шийдсэн байна. 

Мөн Эдийн засгийн форумын үеэр хэлсэн хариуцлагагүй, болчимгүй мэдэгдэлээ залруулахыг Ерөнхий сайд Ч.Сайханбилэгээс шаардаж буйгаа энэ үеэр мэдэгдлээ. Хэрвээ залруулга хийхгүй бол огцруулах асуудлыг хөндөнө гэв.

Тус бүлэг УИХ-ын дарга З.Энхболдыг огцруулах албан шаардлагыг хүргүүлэхээр болсон байна.  Энэ талаар тус бүлгийн дарга С.Бямбацогт “З.Энхболд УИХ-ын даргаар томилогдсон цагаасаа УИХ дахь намын бүлгүүдийг ялгаравлан гадуурхаж, гишүүдийн үг хэлэх эрх чөлөөнд халдаж, эрх мэдлээ хэтрүүлсэн. Мөн хэд, хэдэн удаа ээлжит бус чуулган зарлаж Засгийн газрыг огцруулах, Үндсэн хуулийн цэцийн гишүүнийг огцруулах асуудлыг хэлэлцсэн. Мөн дахин ээлжит бус чуулган зарлаж цөмийн хог хаягдлыг Монголд булшлах асуудлыг хэлэлцсэн. Энэ мэт хууль зөрчсөн үйлдлүүд нь түүнийг УИХ-ын даргаар үргэлжлүүлэн ажиллах боломжгүй гэдгийг илэрхийлж байна. Тиймээс З.Энхболдыг огцруулах асуудлыг хөндөнө” гэлээ.

МАН-ын бүлгийн дэд дарга Д.Хаянхярваа энэ үеэр “Эрх баригчид өрийн мэдээллийг иргэдэд буруу өгч байгаа. Тиймээс манай бүлгээс өрийн мэдээллийг үнэн, зөвөөр нь олж тогтоох ажлын хэсгийг УИХ-ын гишүүн Сү.Батболдоор ахлуулан гаргасан. Энэ Засгийн газар гаднаас өндөр хүүтэй их хэмжээний долларын зээлийг авч байна. Ингэх нь Монгол улсад асар их хохиролтой. Гэтэл УИХ-ын дарга З.Энхболд “Зээл гэдэг бол манжийн үеийн ойлголт. Орчин үед зээл тавьсан хүн л хождог болсон” гэх мэтээр ярьж яваа нь дэндүү хариуцлагагүй байна. 2012 онд зээлийн хүү болон хэмжээ бусад зардалд улсын төсвөөс 37 тэрбумыг зарцуулдаг байсан. 2016 онд 947 тэрбум төгрөгийг зарцуулж байна" гэв. 

Т.Хулан