Асуудал ихтэй ардчилал хэрэгтэй хүнд тойрог гэгддэг Сүхбаатар дүүрэгт аль ч намынхан үеийн үед лидерүүдээ илгээж байсан түүхтэй. Хоёр мандаттай тус дүүргээс өнгөрсөн сонгуулиар АН-аас Р.Амаржаргал, Л.Гантөмөр нар сонгогдсон. Тэд МАН-аас нэр дэвшсэн “ХАС”-ын гэгдэх Ч.Ганхуяг, МАН-ын эмэгтэй лидерүүдийн нэг Ц.Цогзолмаа нартай өрсөлдөн ялж байв.

Энэ удаад Р.Амаржаргал, Л.Гантөмөр хоёр хоёулаа жагсаалт руу явж магадгүй байгаа аж. УИХ-д дөрвөнтөө сонгогдсон Р.Амаржаргал гишүүний хувьд намын жагсаалтад багтах нь бараг тодорхой болсон байна.  Л.Гантөмөр гишүүний хувьд ч мөн ялгаагүй. Түүний хувьд АН-ын нэр хүндтэй гишүүдийн нэг. Олон нийтийн дунд ч рейтинг өндөртэй. Түүний боловсролын салбарт хийсэн шинэчлэлүүд, инженерүүдийг олноор бэлтгэх бодлого, мэддэгээс чаддагийг бэлтгэнэ гэсэн нь нийгэмд таалагдаад буй. Тиймдээ ч хоёр удаа Засгийн газар бужигнахад хоёуланд нь үлдэж чадсан биз. Хамгийн сүүлд МҮҮН-ийг Монголд дэлгэрүүлсэн сайд гэж хочлуулснаас өөрөөр түүнд гоочлох зүйл байхгүй. Гэхдээ олон нийтийн анхаарлыг татсан уг асуудалд тэрбээр тодорхой хариултыг өгчихсөн.

Эд жагсаалт руу явж буй учир тэдний араас  тус дүүргийн засаг дарга Д.Бадарсан АН-аас нэр дэвшиж магадгүй гэнэ. Тэрээр эдийн засагч мэргэжилтэй, Ардчилсан намын залуу лидерүүдийн нэг гэгддэг байна. ИТХ-ын дарга Д.Баттулга энэ тойрогтоо өрсөлдөж байсан танигдсан улстөрч. Бас нийслэлийн орлогч дарга С.Очирбат ч олон жил орон нутгийн сонгуульд энэ тойргийн сонгогчдын итгэлийг дааж гарч ирж байсан.

МАН-аас тус дүүрэгт УИХ-ын гишүүн Сү.Батболд, НАМЭХ-ны дарга Ц.Цогзолмаа болон Барилга хот байгуулалтын сайд асан Д.Цогтбаатар нарын нэр яригдаж байгаа аж.  Сүхбаатар дүүрэгт нэр, хүндтэй явж ирсэн Сү.Батболд гишүүнийг  урьдын адил Сүхбаатар дүүргийнхнээсээ олонхийн саналыг авна гэж улс төрийн хүрээнд ярилцаж байгаа. Түүнтэй хамт нэр дэвших хүн нь Д.Цогтбаатар байх нь. Тэрбээр МАН-ыг Засгийн газарт хамтран ажиллах үед Барилга хот байгуулалтын сайдаар ажиллаж байсан тус намын нэр цэвэр гишүүдийн нэг юм.  Тэрбээр саяхнаас Сүхбаатар дүүргийн намын хорооны даргаар сонгогдон ажиллаж байна. Тус дүүргийн МАН-ын хороо нилээд хэд хуваагдаж хоорондоо зодолдож эхлээд удаж байна.  Олон жил энэ намын хороог даргалж ирсэн Төмөрбаатарыг хуучинсаг, намын гишүүдээ эвлэрүүлэн нэгтгэх бус хагалан бутаргаж байна гэсэн үндэслэлээр өөрчилж, Д.Цогтбаатарт хариуцуулан өгсөн байна. Хэрвээ Сү.Батболд нэр дэвшихгүй бол НАМЭХ-ын дарга Ц.Цогзолмаа зүтгэх нь тодорхой байгаа юм. Харин Сангийн дэд сайд асан Ч.Ганхуягт ийм боломж олдохгүй гэнэ. Учир нь сүүлийн үед МАН-ын удирдлага, гишүүдийн дунд түүний нэр хүнд нь асар их унах болсон бөгөөд харин бие дааж нэр дэвшихийг үгүйсгэхгүй юм.

Мөн топ модель Х.Бадамгэрэлийн нөхөр дуучин Бэки гэх залуу тус дүүрэгт бие даан нэр дэвшинэ гэдгээ албан ёсоор дуулгаад байгаа билээ.

 МАХН-аас Н.Энхбаяр, Э.Эрдэнэжамъяан нар хүч үзэж магадгүй гэх яриа байгаа юм.

Т.Энхэлээ