Одоогоос 26 жилийн өмнө буюу 1990 оны дөрөвдүгээр сарын 7-нд Ардчилсан нам байгуулагдаж анхны хурлаа хийж байжээ. Тус намын дарга З.Энхболд яг нэг жилийн өмнөх энэ өдөр баярын хурлынхаа үеэр АН-ыг фракцигүй нам болсон хэмээн мэдэгдсэн юм. Түүнийг индэрт ингэж хэлж байх хооронд намын залуу гишүүд нь үзэгчдийн суудлаас уриа, лоозон барьж тайван замаар эсэргүүцлээ илэрхийлж байв. Гэсэн ч тэд уриа лоозонгоо хуу татуулж, хурлын дундуур хөөгдөж гарсан юм.

Хөөгдөж гарсан хүмүүс АН-ын ҮЗХ-ны гишүүн Д.Мөнх-Эрдэнэ тэргүүтэй залуус байв. Тэд АН-ын удирдлагууд болон З.Энхболд, Л.Эрхэмбаяр нарыг дүрмийн бусаар албан тушаалд томилогдсон хэмээн эсэргүүцнээс гадна ҮЗХ-г журамд заасан тогтсон хугацаанд нь хуралдуулах мөн АН-д цус сэлбэлт хийхийг шаардаж байсан юм.

АН сүүлийн жилүүдэд ҮЗХ-оо ч хуралдуулж чадахаа байсан. Үүнээс үүдэн АН-аас гарах шийдвэрийг зөвхөн нэг хүн гаргадаг болсон гэх шүүмжлэл бий. Тиймээс ч өнгөрсөн жилийн энэ өдөр залуус нь баярын хурлаараа намдаа тулгамдсан асуудлаа ярилцахыг уриалж уриа, лоозон барьж зогсож байжээ. Тус намынхан баярын хурлын үеэрээ биш ҮЗХ-ны хурлаараа болж, бүтэхгүй асуудлаа ярьж, ойлголцох ёстой.  Албан ёсны хурал нь хуралдахгүй байгаа учраас баярын хурал дээрээ ингэж ойлголцсон нь бас ҮЗХ-г хуралдуулах шаардлага байгааг илтгэж байж ч мэдэх юм.

Үүнээс хойш бүтэн нэг жил өнгөрсөн ч тус нам дээрх асуудлуудаа шийдэж чадаагүй л байна. Энэ нь өнгөрсөн нэгдүгээр сард товлосон ҮЗХ-ны хурлаа хуралдуулах гээд чадаагүйгээс нь харагдана. Мөн сүүлийн үед нам дотор үүсээд буй фракцуудын зөрчил  ил, цагаан тэмцэлээс ч АН нэг л болохгүй байна гэдгийг харж болох юм. Хамгийн сонирхолтой нь З.Энхболдыг АН-ын дарга болоход нь эсэргүүцэж байсан намын залуус нь одоо ч түүнийг эсэргүүцэж байгаа юм. Тодруулбал, өнгөрсөн жил баярын хурлын үеэрээ сенсааци тарьсан нөхөд өнөөдөр ч намын даргыгаа эсэргүүцсээр. Саяхан эдийн засгийн форумын үеэр АН-ын залуу гишүүн Л.Наранбаатар намын дарга З .Энхболд руу ард түмний амьдралыг сүйрүүлсэн хэмээн орилж оймсоо хүртэл шидсэн. Ямартай ч АН-ын залуус З.Энхболдоос намын дүрмээ хэрэгжүүлэхийг шаардсаар. АН-ын энэ их эсэргүүцэл, эвдрэл З.Энхболдыг албан тушаалгүй ч болгож мэдэхээр байгаа юм.