Улсын Их Хурлын чуулганы өнөөдрийн /2016.04.07/ үдээс хойшхи нэгдсэн хуралдаанаар Эрүүгийн хуулийг дагаж мөрдөх журмын тухай хуулийн төслийн анхны хэлэлцүүлгийг хийлээ.

Хууль зүйн байнгын хорооны хуралдаанаар дээрх хуулийн төслийн анхны хэлэлцүүлгийг хийх үеэр ажлын хэсгээс танилцуулсан зарчмын зөрүүтэй 7 саналыг хуралдаанд оролцсон гишүүдийн олонх дэмжсэн байна. Байнгын хорооны санал, дүгнэлттэй холбогдуулан УИХ-ын гишүүн Б.Бат-Эрдэнэ, Д.Лүндээжанцан нар асуулт асуусны дараа Байнгын хороогоор дэмжигдсэн саналын томьёоллуудаар санал хураалт явуулав.

Төслийн нэгдүгээр зүйлийг “2015 оны 12 дугаар сарын 03-ны өдөр баталсан Эрүүгийн хуулиар гэмт хэрэгт тооцохгүй болсон үйлдэл, эс үйлдэхүйд 2016 оны 9 дүгээр сарын 01-ний өдрөөс өмнө үйлчилж байсан Эрүүгийн хуулиар ял шийтгүүлсэн этгээдийг эдлээгүй үлдсэн үндсэн болон нэмэгдэл ял, эрүүгийн хариуцлагын бусад арга хэмжээнээс чөлөөлнө” хэмээн өөрчлөн найруулахыг нэгдсэн хуралдаанд оролцсон гишүүдийн олонх дэмжсэн. Энэ үеэр УИХ-ын гишүүн Б.Бат-Эрдэнэ, хуулийн энэхүү заалтын дагуу хэчнээн хүн ял, эрүүгийн хариуцлагын бусад арга хэмжээнээс чөлөөлөгдөхийг тодруулж байлаа. Улсын ерөнхий прокурорын орлогч Г.Эрдэнэбатын хариулснаар, одоогийн байдлаар ял эдэлж буй хүмүүсийн хэдэн хувь нь суллагдаж, ялаас чөлөөлөгдөх талаар тооцоо гараагүй байгаа юм байна. 9 сарын 1 хүртэл хэчнээн хүн хэрэгт холбогдож, хэчнээн хүн суллагдах нь тодорхойгүй байгаа бөгөөд Эрүүгийн шинэ хуулийг хэрэгжүүлэх ажил эхлэхээр дээрх тоо тоорхой болно гэж хэлсэн юм.

Түүнчлэн төслийн 2 дугаар зүйлийг “2015 оны 12 дугаар сарын 03-ны өдөр баталсан Эрүүгийн хуулиар гэмт хэрэгт тооцохгүй болсон, 2016 оны 9 дүгээр сарын 01-ний өдрөөс өмнө үйлдсэн гэмт хэргийг Эрүүгийн хэрэг шалган шийдвэрлэх тухай хуульд заасан журмын дагуу хэрэгсэхгүй болгоно” гэж өөрчлөн найруулах саналыг хуралдаанд оролцсон гишүүдийн олонх дэмжсэн. Байнгын хороогоор дэмжигдсэн 7 саналыг нэгдсэн хуралдаанд оролцсон гишүүдийн олонх дэмжсэн бөгөөд хуулийн төслийг эцсийн хэлэлцүүлэгт бэлтгүүлэхээр Хууль зүйн байнгын хороонд шилжүүллээ.

“Газар хөдлөлтийн гамшгаас урьдчилан сэргийлэх, эрсдлийг бууруулах талаар авах зарим арга хэмжээний тухай” тогтоолын төслийн анхны хэлэлцүүлгийг хийв

Үүний дараа “Газар хөдлөлтийн гамшгаас урьдчилан сэргийлэх, эрсдлийг бууруулах талаар авах зарим арга хэмжээний тухай” Улсын Их Хурлын тогтоолын төслийн анхны хэлэлцүүлгийг хийлээ. Аюулгүй байдал, гадаад бодлогын байнгын хорооны санал, дүгнэлтийг УИХ-ын гишүүн Ц.Баярсайхан танилцуулав.

Тэрбээр Байнгын хорооны хуралдаанаар дээрх тогтоолын төслийн анхны хэлэлцүүлгийг хийх үеэр УИХ-ын гишүүн Ж.Энхбаяр тогтоолын төслийн 1 дэх хэсгийн 3 дахь заалтыг “газар хөдлөлтөөс хамгаалах арга хэмжээг хот төлөвлөлтийн бодлогод тусгаж хэрэгжүүлэх, төвлөрлийг сааруулж, суурьшлын бүс, дагуул хотыг газар хөдлөлтийн эрсдэл багатай бүс рүү төлөвлөж хөгжүүлэх арга хэмжээ авах”, энэ тогтоолын 1 дэх хэсгийн 3 дахь заалтыг хэрэгжүүлэх хүрээнд Төрийн ордонд байрладаг байгууллагуудыг шилжүүлэн байрлуулах саналыг боловсруулж, 2016 оны 4 дүгээр улиралд багтаан УИХ-д танилцуулах гэж 2 тусдаа заалт болгох, мөн хэсгийн 4 дэх заалтыг “орон сууц, сургууль, цэцэрлэг, эмнэлгийн барилга байгууламжийн чанар, газар хөдлөлтөд тэсвэрлэх байдлыг шалгаж, барилга байгууламжийг паспортжуулах ажлыг 2017 онд багтаан дуусгах, газар хөдлөлтөд тэсвэргүй барилгыг буулгаж шинээр барих, ашиглах боломжтой барилгын судалгааг гаргаж, тэдгээрийг үе шаттай бэхэлж хүчитгэх ажлыг зохион байгуулах” гэж өөрчлөн найруулах зарчмын зөрүүтэй санал гаргасныг Байнгын хорооны хуралдаанд оролцсон гишүүдийн олонхи дэмжсэн гэж танилцуулсан юм.

Танилцуулгатай холбогдуулан УИХ-ын гишүүн Ё.Отгонбаяр, Б.Бат-Эрдэнэ, Д.Тэрбишдагва нар асуулт асууж хариулт авсан бөгөөд Байнгын хороогоор дэмжигдсэн дээр саналууд нэгдсэн хуралдаанд оролцсон гишүүдийн олонхийн дэмжлэгийг мөн авлаа. Ингээд тогтоолын төслийг эцсийн хэлэлцүүлэгт бэлтгүүлэхээр Аюулгүй байдал, гадаад бодлогын байнгын хороонд шилжүүлэв.

Мөн өдрийн хуралдаанаар Боловсролын тухай, Дээд боловсролын тухай хуульд нэмэлт, өөрчлөлт оруулах тухай болон холбогдох бусад хуулийн төслүүдийн анхны хэлэлцүүлгийг хийж эхлэв. Нийгмийн бодлого, боловсрол, соёл, шинжлэх ухааны байнгын хорооны санал, дүгнэлтийг УИХ-ын гишүүн А.Бакей танилцууллаа.

Тус байнгын хорооны 2016 оны 05 дугаар тогтоолоор байгуулагдсан УИХ-ын гишүүн А.Бакейгаар ахлуулсан ажлын хэсгийг дэд хэсэгтэйгээр байгуулсан бөгөөд ажлын дэд хэсэг 3 удаа хуралдаж, төслүүдийн талаар зарчмын зөрүүтэй 8 саналын томьёоллол бэлтгэснийг Байнгын хорооны хуралдаанд оролцсон гишүүд санал бүрийг 100 хувь дэмжсэн байна. Байнгын хорооны санал, дүгнэлттэй холбогдуулан УИХ-ын гишүүн Д.Тэрбишдагва, Ё.Отгонбаяр, Ж.Батсуурь нар асуулт асууж, хариулт авсанаар энэ өдрийн хуралдаан өндөрлөлөө. Дээрх хуулийн төслийг маргаашийн нэгдсэн хуралдаанаар үргэлжлүүлэн хэлэлцэнэ хэмээн УИХ-ын Тамгын газрын Хэвлэл мэдээлэл, олон нийттэй харилцах хэлтсээс мэдээллээ.