УИХ-ын дарга З.Энхболдыг сайн дураараа огцрохыг шаардсан албан бичгийг УИХ дахь МАН-ын бүлгээс өөрт нь гардуулсан. Үүнтэй холбогдуулан АН-ын Ерөнхий нарийн бичгийн дарга Л.Эрхэмбаяр болон бүлгийн дарга Б.Гарамгайбаатар нар мэдээлэл хийлээ.

МАН-ынхан шаардаж байгаа хоёр хуудас бичигт ямар ч авцалдаа үндэслэл алга. Сонгуулийн дараа УИХ-ын даргыг сонгох гэж байхад МАН-ын бүлэг дотроо хуралдаад УИХ-ын даргыг сонгох ажлын зориудаар тасалдуулж байсан. Тиймээс Дэгийн тухай хуулийн дагуу УИХ-ын даргаа албан ёсоор сонгосон. Хэрэв энэ нь хууль зөрчсөн гэж үзэж байгаа юм бол Үндсэн хуулийн Цэцэд хандах ёстой. Өнөөдрийг хүртэл ямар ч акц үзүүлээгүй байж байснаа сонгууль дөхөж байхад шаардах бичиг хүргүүлж байгаа нь авцалдахгүй байна. Хоёрдугаарт, УИХ-ын дарга бол олонх цөөнх гэж ялгах эрхгүй. Гишүүдийн үг хэлэх эрхийг хааж боосон ч зүйл байхгүй. Хаа хамаагүй зүйлийг хамаж шимээд яриад байдаг гишүүд зөндөө байдаг. Түүнийг нь зөв чигтэй удирдах гэсэн оролдлогыг үгүйсгэж болохгүй. Энэ бол зарчмын шаардлага тавьсан хүнийг огцор гэж шаардаж байгаа МАН-ын увайгүй үйлдэлд хэлэх үг олдохгүй байна. Түүнчлэн өргөн барьсан хуулийн төслийг хэлэлцдэггүй гэж шүүмжилсэн байна. Хуулийн төсөл хэлэлцдэг дэг журмаараа явж байгаа. Даргын зөвлөлийн хурлаар хэлэлцэх асуудлаа долоо долоо хоногоор багцалж оруулдаг. Зөвлөлд оруулж ирж байгаа хувилбарыг УИХ-ын Тамгын газраас багцалдаг. Тэрхүү хувилбарыг даргын зөвлөлөөр хэлэлцэж шийдвэр гардаг. Түүнээс УИХ-ын дарга ганцаараа шийддэггүй гэдгийг мэдэж байгаа байх гэж тус бүлгийн дарга Б.Гарамгайбаатар мэдэгдлээ. МАН-ын шаардлагад фашист, коммунист гэх мэт үг хэрэглэсэн байна. Хэн нь фашист, хэн нь коммунист билээ гэдгийг ялгах хэрэгтэй. Коммунист гэвэл МАН-ыг өөрийг нь хэлнэ. Фашист гэж хэнийг хэлээд байгаа юм мэдэхгүй. АН бол АН. Ийм бичиг барьсаны зоргоор УИХ-ын дарга огцорно гэж юу байхав. Энэ бол МАН-ын улс төрийн тоглолт. АН дотоод асуудлаа өөрсдөө шийддэг болохоос МАН-ын заавраар шийднэ гэж байхгүй гэдгийг албан ёсоор мэдэгдье гэж тэрбээр мөн мэдэгдсэн юм.

Харин АН-ын Ерөнхий нарийн бичгийн дарга Л.Эрхэмбаяр “МАН-ын бүлгийн хувьд хувь хүн рүү дайрсан З.Энхболд даргыг гутаан доромжлохыг завдсан гэдэг нь харагдаж байна. Жишээ нь, ээлжит бус чуулганаар цөмийн хог хаягдалалтай холбоотой хуулийг батлах гэж байхад МАН-ынхан чуулгандаа ирэхгүй байж БНХАУ-ын коммунист намынхантай уулзаад явж байсан. АН-ын даргыг Ерөнхийлөгч, Ерөнхий сайдын бүрэн эрхэд халдсан гэж гүтгэж хооронд нь хагаралдуулахыг оролдож байна. Сонгууль дөхөж байгаа учраас улс төрийн оноо цуглуулах гэж явуургүй үйлдэл гаргахаа зогсоо гэж МАН-ын бүлгээс шаардаж байна” гэлээ.

Үүний дараа сэтгүүлчдийн сонирхсон асуултад хариуллаа.

-Сонгуулийн тухай хууль дахь жагсаалтын квотоос хасах гээд байна гэсэн зүйлийг яриад байгаа. Энэ талаар ямар байр, суурийг илэрхийлэх вэ?

Б.Гарамгайбаатар: -Сонгуулиас зургаан сарын өмнө хууль нь өөрчлөгдөхгүй гэдгийг Төрийн байгуулалтын байнгын хорооны дарга удаа дараа хэлсэн. Жагсаалтаас 4 мандат нийслэл рүү шилжүүлэх төслийг нэг гишүүн бэлтгээд байгаа. Гэхдээ үүнд УИХ-ын дарга “Энэ бол нэг гишүний өргөн барьдаг төсөл биш. УИХ-д суудал бүхий бүх нам, эвсийн бүгдийнх нь хамтын бүтээл болгон өргөн барибал хэлэлцэж болох юм” гэсэн.

-АН-ын бүлэг өргөтгөсөн хуралдаанаараа юу хэлэлцэх вэ?

Б.Гарамгайбаатар: Ардчилсан намын бүлэг маргааш ээлжит бусаар хуралдах гэж байгаа. Намын ҮЗХ-ны хурлын бэлтгэл ажилтай холбогдуулаад, СЕХ болон аудитын газар мөрийн хөтөлбөрөө өгөх гэж байгаатай холбогдуулаад мөн бусад асуудлаар хуралдах гэж байгаа.

Л.Эрхэмбаяр: -Намын ҮЗХ-ны бэлтгэл болон намын мөрийн хөтөлбөрийн талаар хэлэлцэнэ. ҮЗХ энэ сарын 16-нд хуралдаж, мөрийн хөтөлбөрөө батална.

Т.Энхэлээ