УИХ дахь АН-ын бүлэг өнгөрсөн бямба гаригт Их тэнгэрт өргөтгөсөн хуралдаан хийсэн. Хуралдаан тус өдрийн 17.00 цагийн орчимд эхэлсэн бөгөөд хэд, хэдэн асуудлыг хэлэлцсэн байна.

Тодруулбал, тус хуралдаанаар дотоод асуудлаа ярилцаж бүрэн ойлголцолд хүрсэн талаар АН-ын бүлгийн дэд дарга С.Одонтуяа мэдээллээ. Тэрээр АН-ын бүлэг эв нэдлийн хурлаа хийж ойлголцолд хүрсэн гэдгийг тодотгожээ. Их Тэнгэрийн АН-ын бүлгийн хуралд нийт 35 гишүүн оролцох байснаас 30 гишүүн оролцжээ. УИХ-ын гишүүн Б.Болор, Г.Баярсайхан, Д.Бат-эрдэнэ, Д.Эрдэнэбат, Б.Наранхүү нарын гишүүд хөдөө орон нутагт ажиллаж байгаа тул хуралд оролцож амжаагүй байна. Ерөнхийлөгч Ц.Элбэгдоржийг урьсан боловч ирээгүй гэх мэдээлэл байна. Харин сүүлийн үед дуулианы эзэн болоод буй Н.Алтанхуяг гишүүн хуралд суусан ч дундаас нь орхиж явжээ. Мөн Н.Алтанхуяг, Х.Баттулга нарын гишүүдийн намын гишүүдийнхээ эсрэг мэдэгдэл хийснийг тодруулж дахин ийм үйлдэл гаргахгүй байхыг анхааруулсан байна. Цаашид бие, биенийхээ эсрэг мэдэгдэл хийх бус намын бүлэг дотроо асуудлаа шийдэх хэрэгтэй гэдэг шийдэлд хүрсэн байна. Тус хурлын үеэр УИХ-ын гишүүн Х.Баттулга өөрийнхөө хоёр хүнээ баривчлуулсанд их гомдолтой байгаагаа хэлжээ.

Энэхүү хуралдаанд УИХ дахь Ардчилсан намын бүлгийн гишүүдээс гадна Нийслэлийн Ардчилсан намын хороо оролцсон байна.

Т.Энхэлээ