УИХ-ын гишүүн Х.Баттулгын Баянгол дахь албан өрөө рүү нь цагдаагийхан болон тусгай албаныхан нэвтэрсэн талаар бид өмнө нь мэдээлсэн. Одоогийн байдлаар 30 гаруй цагдаа Баянгол зочид буудал руу нэвтэрч нэгжлэг хийгээд байгаа юм. Мөн тус зочид буудлыг бүхэлд нь битүүжилж хэнийг ч оруулж гаргахгүй байгаа талаар манай сурвалжлагч мэдээлж байна.

Уг мэдээллийг сонсоод Зам тээврийн сайд М.Зоригт,  УИХ-ын гишүүн Г.Уянга, Хотын дарга Э.Бат-Үүл, УИХ-ын даргын зөвлөх Г.Байгальмаа, Сүмогийн аварга Д.Дагвадорж, Олимпийн аварга Н.Түвшинбаяр нар ирээд байна.

Тэд энэ талаар ямар байр суурь илэрхийлснийг хүргэе.

Зам тээврийн сайд М.Зоригт:- Энэ тухай мэдээллийг сошиалаас аваад ирлээ. Арай үгүй байлгүй дээ.

Нийслэлийн Засаг дарга Э.Бат-Үүл: - Нэгжлэг хийхэд яагаад тусгайгийнхан ирдэг юм. Хуулиар бол нэгжлэг хийх гэж байгаа бол мөрдөн байцаагч, прокурор хийх ёстой. Би сошиалаар мэдээлэл аваад ирлээ.

УИХ-ын дарга З.Энхболдын зөвлөх Г.Байгалмаа: -Фэйсбүүкээр мэдээлэл аваад ирлээ. УИХ-ын гишүүний халдашгүй дархан байдалд халдаж, хууль зөрчиж байгаад харамсаж байна. Х.Баттулгатай холбоотой төмөр замын асуудал, мэдээлэл нь олон нийтэд нээлттэй байгаа.

Сүмогийн аварга Д.Дагвадорж: - Би дөнгөж сая твиттерээс мэдээлэл аваад яарч сандраад ирлээ. Хамтдаа хүлээцгээе. Учрыг нь лавлая

АН-ын бүлгийн дарга Гарамгайбаатар:  Ямар ч мэдээлэл байхгүй болохоор хариулт өгөх боломжгүй байна. Би үүнийг харах гэж ирсэн. Х.Баттулгыг баривчлах гэж байна гэх мэдээллийг ордноос аваад ирлээ.

Х.Баттулгын охин Б.Намуун: Цагдаагийн тусгай албаныхан өдрийн 13 цагаас хойш байгууллагыг битүүмжлэн шалгаж байна. Оюутолгойн асуудал дээр дуугарсан болгоныг шалгаж байгаа нь тун харамсалтай. Одоо бүх зүйл ил цагаандаа гарлаа.

Баянгол зочид буудал дотор УИХ-ын гишүүн Х.Баттулга, Л.Эрдэнэчимэг, Д.Ганбат нар хамт байгаа юм.

 Д.Дагвадорж аваргыг дотогш нэвтрүүлэхгүй байсан ч тус зочид буудлын арын хаалгаар хэдэн бөхчүүдийн хамт орлоо.

Т.Энхэлээ