Өчигдөр цагдаа, тусгай хүчнийхэн “Баянгол” зочид буудалд байрлах “Түмэн хишигтэн”, “Баялагийн хувь” компанийн байранд нэгжлэг хийн бичиг баримтуудыг нь хурааж авч явсан билээ. Тэгвэл энэхүү үйл явдалтай холбоотойгоор УИХ-ын гишүүн Л.Эрдэнэчимэг саяхан сэтгүүлчдэд байр сууриа илэрхийллээ.

Тэрбээр “Хууль зөрчсөн үйл ажиллагаа хэрээс хэтэрлээ. Өнгөрсөн бямба гарагт АН-ынхан “Их тэнгэр”-т хуралдахдаа эв нэгдлийг баримталъя. Сонгууль дөхөж байгаа учраас дотооддоо зөрчилдөөд хол явахгүй гэсэн зүйл ярилцаад, гар бариад салсан. Гэтэл даваа гарагийн өглөө Х.Баттулга гишүүний туслахаар ажиллаж байсан хоёр хүнийг баривчилсан байсан. Тиймээс АН-ын бүлгийн хуралдааны үеэр Х.Баттулга гишүүн энэ асуудлыг ярьсан. ЦЕГ-ын даргыг Ерөнхий сайд томилдог. Ерөнхий сайд хэрвээ хууль зөрчсөн үйлдлээ зогсоохгүй бол МоАХ Засгийн газарт ажиллаж байгаа дөрвөн сайдаа буцааж татах шаардлага тавьж байгаа. Цагдаагийн ерөнхий газрын томилгоог Ерөнхий сайд өөрөө хийдэг. Гэтэл томилсон хүмүүс нь эргээд Ерөнхий сайдын удирдлагад орохоо больчихсон юм шиг байгаа юм. Бидэнд цагдаагийн байгууллагын асуудлыг анхаарна гэж хэлдэг атал шийдэгдэхгүй байсаар хэдэн сарын нүүр үзлээ. Энэ хооронд маш олон баривчилгаа явагдлаа. Тэр битгий хэл эмэгтэйчүүд рүү хандсан баривчилгаа ч нэмэгдэж байна. Тиймээс Ерөнхий сайд цагдаагийн хууль бус үйл ажиллагааг зогсоохгүй бол бид дөрвөн сайдаа татаж Засгийн газраа унагаах чиглэл рүү явж таарах юм шиг байна” хэмээн ярилаа.

Т.Энхэлээ